好旅伴的8個指標～配行緊湊行程，極速化妝不遲到、充當人肉GPS兼幫你瘋狂影相！
有得去旅行絕對係番工嘅動力！雖然話行程同景點好重要，不過更重要嘅一定係遇到一個好旅伴～正所謂「相見好，同住難」朝夕相對幾日，性格夾唔夾真係好易就feel到～如果你嘅「旅伴」中咗以下一半或以上指標，就要好好珍惜佢哋喇～因為佢哋唔單止係一個好旅伴，仲係一個抵得諗、識得將心比己嘅人！人生有一個咁嘅好友、情人，真係好幸運～
＃1 唔會無啦啦黑面
去旅行難免會早起身，出現筋疲力盡嘅情況，又或者遇上行程、景點同期望有落差令你失望而回嘅經歷～反正旅行本來就係需要發掘新事物先有樂趣。有部分人會因為種種外在因素影響心情，不知不覺間黑起塊面，真係令人非常唔開胃。相反，重視氣氛同尊重別人嘅旅伴，就會珍惜旅行分秒，即使景點、食物中伏，大家都開開心心笑一笑就過了～
Photo from roxannetong @ ig
＃2 主動提出幫手plan 行程
去旅行嘅事前準備功夫非常多，特別係到訪未曾踏足過嘅地方～如果對方願意主動提出幫手plan 行程、預約各種事項，做好分工合作嘅話，就會大大減低出錯機會。當雙方對行程有基本概念，唔會單純將行程責任交畀事但一方，行程規劃係經過有商有量嘅溝通，大家都會比較滿意結果，更成為你哋回憶嘅一部分呢！
Photo from wongmanyik @ ig
＃3 積極配合行程
每人去旅行前都應該要有共識—當日嘅景點係屬於靈活性大定靈活性細，比如行程緊湊、交通工具班次疏落，必須有規劃地準時外出、乘搭交通工具等。如果你嘅旅伴往往都係行動遲緩派，又或者唔配合行程，都真係幾頭痕～珍惜永遠瞓到最遲一刻，但又願意化少啲妝就出門嘅旅伴吧～要知道佢哋犧牲咗化妝時間，絕對值得稱讚！
Photo from wongmanyik @ ig
＃4 唔會去前咩都無所謂，去到就嫌三嫌四
正如上文咁講，有人幫手plan 下行程真係幾好，但總有人去前會話「事但啦，我咩都okay啊～」但當去到景點後發現有落差，就會即時嫌三嫌四，呢樣唔好，個度又唔好～如果你嘅旅伴唔單止會陪你一齊睇行程，中伏時仲會反轉頭安慰你，真係好窩心架！
Photo from wongmanyik @ ig
＃5 同你一齊做低能嘢
獨遊有獨遊嘅清靜，同旅伴一齊如果可以做低能嘢，感覺真係會年輕10歲，重回到青春嘅時光～比如係一齊邊行邊唱歌，一齊敷住面膜跳舞，有咩煩惱都暫時忘記得一淨二淨～
Photo from paisleyhu @ ig
＃6 點攰都願意陪你一齊去
如果去旅行郁啲就嗌攰，要坐低抖吓甚至取消行程，都咪話唔掃興～好嘅旅伴會唔會再疲倦掛喺口唇邊，堅持陪你去想去嘅、食你想食嘅，完完全全把你寵上天，咁就very good 喇！
Photo from paisleyhu @ ig
＃7 人肉GPS
好多女仔都係一名路痴，天生認路能力就比較弱，你估真係個個都做到人肉GPS咩～只係佢願意為你大熱天時喺路邊睇住地圖帶你路，固然要多謝佢哋天生有方向感，更要多謝佢哋願意犧牲自己，避免大家行冤枉路啊～
Photo from missjni @ ig
＃8 做你嘅攝影師
影相呢回事，真係好考耐性同技術。如果旅伴係唔介意幫你影出網紅相，又會教你擺pose影出最瘦嘅一面，真係要讚啊！
Photo from paisleyhu @ ig
Text: TopBeauty Editorial
Photo source: Instagram
