周杰倫迷倒她不是沒原因！天王嫂昆凌高情商對答，低調謙虛有教養，男人都愛的智慧型女人～

娛樂圈中有唔少恩愛夫妻，但要數浪漫童話故事，莫過於周杰倫同昆凌夫婦！當年周董同昆凌發展地下戀長達4年，係2014年終於拉埋天窗，至今育有一子一女Hathaway和Romeo～二人不時係網上曬恩愛，每日都好似熱戀期咁！周杰倫曾經同蔡依琳、侯佩岑等當紅女星拍過拖，可以話係金童玉女，但最後都選擇咗比佢細14年嘅昆凌～當年好多人都覺得年紀輕輕嘅昆凌配唔上天王，但多年後嘅今日，昆凌憑住係媒體前得體嘅對答，以及出色嘅工作表現，網友對佢近乎零負評～昆凌嘅高情商、以及謙虛有教養嘅性格，根本就係每個男人心中嘅完美老婆～！

Photo from ig @ hannah_quinlivan

昆凌曾經係周杰倫有份投資嘅潮服店做兼職，服裝店老闆剛好係周杰倫嘅同學，係一次朋友聚會中周董一眼就看上了外貌出眾嘅昆凌，繼而展開熱烈追求～當年只有17歲嘅昆凌突然被一個天王追求當然嚇到，昆凌曾坦言當初未有心理準備成為天王女友，感到極大壓力，打算逃避走到美國求學～怎料到美國第三日，周董竟然飛到美國出現係昆凌眼前，當時昆凌非常感動，決定付託終生俾呢個男人～

Photo from ig @ hannah_quinlivan

同天王拍拖，我諗每個女生都會想炫耀一番～但昆凌同周董拍拖4年間從來冇對外公開過拍拖細節，甚至推掉所有談話節目邀請，對戀情隻字不提～有教養嘅昆凌講過爸爸從少就教佢唔可以講大話，所以當時被問到感情問題都會相當尷尬：「當大家問我的時候，我不能說實話，但又不想說謊，我不知道該怎麼回答，就只能尷尬的笑，只能傻笑」乖巧嘅昆凌每次都會好小心說話，非常顧及周董天王地位～

Photo from ig @ jaychou

Photo from ig @ hannah_quinlivan

二人係2014年舉行童話式婚禮，婚後昆凌開始接受傳媒訪問，難得分享天王嘅感情故事各傳媒當然唔會放過佢～但面對排山倒海嘅訪問以及尖銳問題，昆凌完全唔會黑面，談到追求細節都唔會講得太深入，對答適可而止～面對主持人咄咄逼人嘅提問更會用幽默方式輕鬆帶過，性格不燥不急，情商同智慧都100分！昆凌亦從來唔會主動談論丈夫，只要周董一日未公佈嘅事都唔會講～昆凌最近就被記者問到周董身型好像胖了，昆凌機智秒回：「你應該看錯了」，記者問到周董有否量體重，佢話：「他應該沒有量體重，人只會在瘦的時候量」回答輕鬆帶過，處處維護丈夫～

Photo from ig @ jaychou

Photo from ig @ hannah_quinlivan

貴為天王嫂，本來可以「翹埋雙手唔使憂」，但昆凌卻擁有上進嘅事業心，除咗選修導演課程，懷孕期間更加作詞，生產三日後甚至係輪椅上參加電影試鏡，更擁有自己服裝品牌，成為一個事業型媽媽～曾經有記者問佢：「為什麼周杰倫這麼有錢，你還要出來工作？」昆凌回應：「因為我想要讓她(女兒)之後覺得，我們父母都是努力工作的人，以我們為榮。」昆凌希望自己係事業上能夠配得起天王老公，「因為老公，我很快的得到很多很好的資源、很好的機會，所以我更應該要精進自己，不管在心裡或專業狀態上，都更多的去努力，我不要自己只是一個附屬品，這樣，我才能夠配得上我所擁有的」昆凌更積極規劃自己嘅人生，打算30歲前在幕前，30歲後在幕後，心境非常成熟，難怪成為天王愛的女人～！

Photo from ig @ hannah_quinlivan

Photo from ig @ jaychou

其實比起冰山美人，男人一生可能只係想搵一個好似昆凌咁高情商、乖巧、不易發脾氣、事事得體嘅女人～昆凌曾經提及維持幸福婚姻秘訣係凡事保持心境開朗，要為小事滿足，不要為小事抱怨，因為自己嘅情緒會容易影響身邊嘅人，要做個知足常樂，努力為自己打拼嘅小女人～深入了解昆凌後發覺佢魅力及得上老公，不愧係圈中無敵嘅天王嫂！

Photo from ig @ hannah_quinlivan

Text：TopBeauty Editorial

Photo source：Instagram