有一種愛叫喜歡整蠱你～7個男友整蠱女友方法，口水、小強齊出動，除了反白眼我還能做什麼！

天下間嘅男人都好似天生有個鍾意虐待人嘅心，每次見面都要嚇你幾鑊先滿足！有人話男人可以無所顧忌咁整蠱你代表你地感情已經相當穩定，同啱啱拍拖唔一樣，完全表露自己真性情，只係開下玩笑唔會動真粗～計我話只係我地女人大人有大量，其實好想嬲但咁小事又嬲唔落，每次除咗反白眼都唔知可以點！記得要好好珍惜身邊嗰個點玩佢都唔會真嬲嘅女朋友～

Photo from ig @ blackielovelife

1.從身後突然出現嚇對方

每次約埋係一個地方等，男友總係會花盡心思諗出場方法，簡單版可能拍你右邊膊頭，然後去你左手邊等你以爲冇人；用心版可能突然從後俾個大擁抱殺你一個措手不及，仲要問你驚唔驚喜！我只係想講好有驚喜，但驚多過喜呀大佬！

Photo from Pinterest

2.餵食物給對方但最後自己吃掉

情侶拍拖互相餵食都好正常，唔知點解由對方餵好似會好味啲～不過都有例外，因為好多時男朋友會扮餵女友，但餵到差唔多埋口最後自己俾食咗～見到女友個無奈樣仲好鬼滿足！最後比女友個黑面樣嚇到即刻殷勤餵食，早知今日，何必當初呢！

Photo from Pinterest

3.接吻時向對方噴一臉口水

錫錫本來係一件好浪漫嘅事，但好多男仔都會視錫錫為整蠱女友好時機！除咗儲滿口水錫落去，搞到女方成面口水，有時仲會向住女友個嘴吹氣，見到女友成個雞泡魚就會好開心！其實有時衛生問題已經冇得介意，我最介意係我個妝花晒呀！

Photo from Pinterest

4.專登在對方面前放屁

唔知男朋友係咪睇新聞講聞臭屁可以防癌，所以成日為女友健康著想俾臭屁對方聞！係街上放已經算有公德心，有時係搭升降機得兩個人嘅時候放，每吋空氣都充滿住佢尋日進食嘅味道，終極版本係係被窩入面放，嗰刻真係會有走投無路嘅感覺！

Photo from Pinterest

5.吃飯時傳送自己的便便給你看

唔知點解男士們對自己嘅排泄物特別感興趣，抑或想分享俾女友知佢嗰日嘅健康狀況，時不時都會傳送高清便便相俾女友！有時不為意打開一看，真係好想秒速刪除！嚴重起嚟試過食飯時見到，或者俾隔離同事見到，真係想即刻飛奔閃人！

Photo from Pinterest

6.用假昆蟲嚇對方

男友總係好鍾意見到女友受驚嚇嘅樣，好有心機咁將假小強、假四腳蛇收藏係每一個角落，例如係手袋、床、梳化、廁所、電腦，每次見到女友嚇到尖叫都會好似中六合彩咁開心！不過呢啲把戲其實玩多一兩次已經好易穿煲，正所謂你唔厭我都厭啦！

Photo from Pinterest

7.在你不為意時拍下你的醜照

邊個話男友都願意幫女友拍打卡美照，其實佢地最鍾意就係幫女友拍醜照！搭車時瞓覺會俾佢影、食嘢時食到成嘴都係會俾佢影、正經影相時會zoom到個樣勁近影大頭相，男友手機相簿中影女友嘅正經照和醜照比例估計係9:1⋯⋯

Photo from Pinterest

打完小編都覺得心很累啊～每日比男友嚇到心臟變得好強壯！雖然每次都好嬲，但見到男友開懷大笑，怒氣唔知點解又會好快消失～將來冇人整蠱你更加可能會唔適應！不過男朋友啊，不如俾我抖一日啦好嗎？

Text：TopBeauty Editorial

Photo source：Instagram、Pinterest