《法證先鋒4》湯洛雯頂替黃心穎重拍 「靚湯順眼勁多！」形象正面觀眾勁撐～！

「安心偷食事件」鬧得滿城風雨，黃心穎形象插水惹民憤，大台即刻抽起晒所有有關佢嘅節目，當中包括重頭劇《法證先鋒4》，而湯洛雯（靚湯）已被監制梅小青證實將會頂替黃心穎重拍《法證先鋒IV》！

喺《法證先鋒IV》演記者嘅第三女主角黃心穎所有戲份都會被刪除，並由靚湯補上重拍，此舉令大台要額外耗資1000萬製作費，可見《法證先鋒IV》非常有份量！

早前呢個角色一直都未有頂替人選，不過日前梅小青就正式證實將由靚湯接捧，雖然外界形容靚湯今次係「執二攤」，不過佢就大方表示最緊要做好角色，自己會加倍努力，當務之急係揣摩好個角色同做功課，真係好乖女！

靚湯今個月頭生日，而梅小青就話當呢個角色係送畀靚湯嘅生日禮物！佢昨日已返公司見傾劇本同試造型，更被告知要喺6月頭前減肥10磅，靚湯都表示無問題！湯洛雯嘅體重一直唔太穩定，雖然早排曾試過肥達140磅，不過佢之後一直努力減肥同戒日～

消息一出網民都拍爛手掌大讚靚湯：「靚湯順眼勁多」、「鍾意睇佢做戲」、「贏一百條街」等等，非常支持大台此次決定，而《法證先鋒IV》則將會於6月1日開始重拍。

Text：TopBeauty Editorial

Photo source：IG