第三代承傳爺爺傳統造鞋工藝，造鞋女師傅Miru：「繡花鞋連結我們一家人。」

By manis on 10 May 2019

「繡花鞋」三字，讓人感到有老一輩的感覺，偏偏片中的女生Miru對繡花鞋情有獨鍾，幾乎每天都會穿上自己手製的繡花鞋。是繡花鞋令她找到人生目標，更連繫Miru 一家人。

不時有人吐槽，大學時期讀嘅知識，投身社會後會發現無實際幫助，成功始終需要靠人脈同運氣。功利社會下，「活學活用」一詞都慢慢變得有距離感。大學修讀設計課程嘅Miru，起初接觸設計全因個人興趣。或者連Miru自己都無諗過，自細成長於設計氛圍下，令佢慢慢重回爺爺手工藝品嘅懷抱中，不但成為繡花鞋「先達商店」第三代傳承人，更以現代人角度，令呢門漸趨式微嘅傳統手工藝增添一抹時尚光彩。

先達商店由彌敦道樓梯底舊鋪起家，初時只造拖鞋款式，後來因應現代人需要，嘗試造不同款式，一做就係逾60年。雖然樓梯底舊鋪早已儲落一班舊街坊、老顧客，但人情味始終敵不過市區發展嘅命運。2011年業主逼遷，當年Miru爸爸更一度想將先達商店「光榮結業」，Miru稱：「我想繼續做落去。」全因一個堅持—希望繼續有香港特色嘅繡花鞋。

Miru自細跟爺爺嫲嫲一齊住，同一屋簷一下，映入眼簾嘅都係林林種種嘅繡花鞋。Miru笑言，小時候以為繡花圖案是直接畫上鞋面，直到爺爺嫲嫲從旁教授，慢慢就培養出一份對繡花鞋嘅審美觀，由一針一線造出嘅刺繡圖案、繡花鞋款式、物料等等，Miru都甚有研究，平時都會跟屋企人一齊閒話造鞋趣事，閒話造鞋日常變成一種家庭樂，「繡花鞋好像連結我們一家人。」

從Miru身上睇到嘅並非一個成功創業嘅例子，而係一個守業故事，更係一個「守老業」嘅經驗之談。既要保留傳統特色，亦要增添時尚、貼合現代人所需要嘅新元素，要守住「香港特色繡花鞋」嘅老業，可謂知易難行。除咗採用新穎布料如麻布、牛仔布、甚至螢光布料外，繡花鞋形設計上同時要「與時並進」—並非一味講求新潮、時尚，Miru更體貼地照顧爺爺年代嘅一班舊顧客需要，考慮到舊客人年紀開始大，佢設計出實用性與外觀兼備嘅鞋款，成功留住一班舊客人。