80後女生創時尚哺乳內衣品牌，希望配合孕婦愛美時刻「不同階段女性都有貪靚的權利」

By Michelle on 20 May 2019

Digital Editor

Life is short, don't be lazy . Be your own idol to enjoy every moment !

今年33歲的Karen於2016年成立內衣品牌Silver Lining Lingerie，主打本地時尚內衣，專做哺乳內衣及睡衣起家，「我希望媽媽即使喺懷孕時期都可以好靚，無需介意自己嘅身材走樣，着上我哋嘅內衣會感到舒服自在有自信。」

懷孕係女人一生中最美時刻之一，肚裡面有一個小生命即將誕生係令女人何添一份美麗。唔同階段嘅女士對護膚、打扮有唔同需求。對於新手媽媽嚟講，衣櫃中第一樣要「棄舊迎新」添置新裝嘅衣物必定係貼身內衣。由於懷孕之後身型改變非常大，漲奶時如果不慎選用唔合適嘅內衣，更會有壓逼之感，因此哺乳內衣一直都係哺乳媽媽們嘅關注嘅話題。

Karen自言，自己一手一腳創立網店Silver Lining Lingerie，品牌以時尚哺乳內衣為主。有別於哺乳媽媽要著「大媽款胸圍」嘅認知，「我身邊有好多媽媽朋友，成日同我講啲孕婦胸圍好核突同老套，甚至會被老公厭棄，價錢貴而且款式選擇又唔多，我覺得其實孕婦bra都可以靚，媽媽着起上嚟都可以有自信同性感。」便萌生創業念頭。

Karen 棄用肉色或深色款布料，改為選用喱絲、粉色系顏色等美觀物料。胸圍除咗物料上有改變，同樣著重實用性，胸圍設計加設前扣，方便媽媽餵哺母乳，「因為媽媽在懷孕期間，身體變得敏感，所以設計嘅胸圍係沒有鋼線，避免壓住乳線，造成阻塞的問題。另外，我哋嘅胸圍有6個背扣，方便脹奶前後可以調較鬆緊，即做生完BB都可以著得返，唔需要經常買新，可以慳返唔少。」無論係準媽媽定係新手媽媽，都可以穿上令人自信滿滿嘅時尚胸圍。

時裝設計講求潮流觸覺，而設計哺乳內衣困難之處在於每位哺乳媽媽身體變化各有不同，就懷孕到哺乳初期至後期已經變化甚大，難以創造出完美款式適合天下間媽媽。因此Karen笑稱自己需要代入媽媽角色，了解佢哋嘅喜好同需求，設計出唔同款式，合乎市場上各媽媽需要嘅貼身衣物，「始終自己冇懷孕經驗，未必好清楚佢哋嘅難處，所以經常問身邊懷孕嘅媽媽朋友，又會畀佢哋試著，然後再加以改良。」

Karen屋企本身經營內衣製衣業，自少就對女性貼身衣物有相關認識，亦因此驅使佢有自立門戶嘅念頭。對於有做生意經驗嘅Karen嚟講，佢深明做生意講求口碑，尤其針對小眾品牌，若果產品質素參次，絕對會因口耳相傳而令品牌形象盡失。曾經試過有顧客向公司反映某款胸圍較易鬆—輕微嘅質量問題，Karen都選擇將全部貨品下架，力保品牌形象。「即使覺得浪費，但你只得一個機會去給客人留下印象，我哋寧願留低最好給客人。」

公眾餵哺母乳在香港仍是備受爭議的話題，大眾對媽媽在公共場所哺乳接納度低，Karen坦言「現時香港對於哺乳仍然保守，社會唔太接受公眾場合哺乳，希望透過我嘅品牌同設計，令大眾覺得哺乳係平常事，能夠方便媽媽哺乳，減少她們所面對的壓力。」

Photo from silverlininglingerie @ ig

Karen甚至搵到以美好身材見稱嘅林芊妤（Coffee）為品牌做宣傳，於坐月期間著上Silver Lining Lingerie嘅內衣拍照分享。最令佢滿足嘅係得悉到媽媽們喜歡自己設計嘅產品，唔單止乎合孕婦追求嘅舒適度外，更美得令客人著上自家品牌嘅內衣、睡衣拍唯美孕照，留下最美一刻嘅倩影。一盤良心生意，最大滿足感或者就係由衷地感動到客人，遠比起賺盡分毫來得重要。