古天樂重返樂壇！極罕有開金口與謝安琪Kay以「夫妻檔」合唱，帥氣飾演完美人夫～！

講起古天樂（古仔）好多人都會聯想到佢拍過嘅戲，樂壇完全同佢扯不上邊，不過其實古天樂都曾經喺香港樂壇活躍過一段短時間，唱過令人耳熟能詳嘅歌，例如《今期流行》同《尋秦記》主題曲等，近年又為電影《殺破狼》唱過《月亮代表我的心》！而今次古天樂真正重返樂壇啦！佢將會聯同謝安琪（Kay）一齊以「夫妻檔」合唱歌曲《（一個男人）一個女人和浴室》，大家瘋狂尖叫吧！

今次能邀請古仔復出唱歌，全因佢早前同麥淩龍（Juno）拍攝電影《風林火山》後十分欣賞對方，而且呢首歌不單只是一首歌，而係好似一部電影咁，需要古仔好似拍戲咁要了解同投入角色後先去錄音。

古天樂：「好欣賞Juno嘅細心，電影上嘅理念跟我相似，最難得係肯花時間去做電影。娛樂圈最緊要肯踏出第一步試唔同範籌，去創新唔怕蝕底先可以有新一頁，我唔擅長唱歌，但《一個男人》唔單係首流行曲，係整個故事嘅一部分，一個回憶，我以藍定凌嘅身份去唱，係一個表演，有劇情，就如一部電影，所以我試，假如真的會拍成電影，我也會期待！」

而《（一個男人）一個女人和浴室》其實係麥浚龍同謝安琪多支MV如《人妻的偽術》同《勇悍・17》嘅續集，Juno同Kay喺MV中分別飾演董折、蒲銘心，而古仔喺今次新歌中飾演Kay（蒲銘心）嘅第二任丈夫——藍定凌，呢個角色係一個完美嘅男人，而且好細心好錫心老婆，再加上古仔嘅帥氣樣子，實會迷倒唔少女仔啊（心心眼）～～

Kay：「古仔所飾演的藍定凌跟Juno所飾演的董折很不同，藍定凌係個近乎完美嘅男人，佢細心，尊重另一半，尊重愛情，遷就對方，今次以大家角色出發去唱歌，有別以往典型唱法，不再單純只係歌者演繹一首單曲，有角色有情緒，相信大家聽歌後會感同身受，想有個咁好嘅老公。」

古仔同Kay錄音好順利，不過當Kay講到要一齊唱Live時，古仔就即刻耍手擰頭：「做咩都得，唔好要我唱live，呢首歌歌詞句句唔同，冇重複，我揸起支咪已經壓力喇！」雖然古仔咁講，但相信粉絲們一定有機會聽到佢唱現場，大家就期待一下吧～！

Text：Girlslike Editorial

Photo source：Pinterest, Facebook, IG