無能力還10幾萬卡數，哭著加入TVB求生機。54歲曹永廉：柳暗花明又一村！打拼逾20年終於等到收成。
成日話女人唔補好易老，的確男人係「養顏」呢方面從來唔係「行家」，但就有唔少逆齡生長嘅男藝人。近排密密拍劇嘅曹永廉，今年已經54歲！成日拍劇捱更抵夜，曹永廉笑言根本無時間護膚，而且有時間都畀咗屋企人。護膚術全靠自己識得調節心態，雖然會諗好多野，但從來唔放喺心上～
Photo from chowinglim ＠ ig
阿廉入行前做過快餐店、賣童裝、清潔工人、甚至胸圍售貨員，後來參加歌唱比賽入行，90年代踏足娛樂圈，但只不過係「歌手助理」，當年佢無收入，只可以靠積蓄過活，捱咗幾年先可以明正言順以「歌手」身份出碟。無錯， 雖然已經係24年前嘅事，或者你都仲係後生女，其實曹永廉已經推出過3張唱片—《情深款款》、《唯一的女神》及《不惜一切》。
Photo from from Youtube
90年代樂壇星光熠熠，企喺粒粒巨星隔離，曹永廉即使點樣斯文靚仔，形象入屋，都只可以紅歌不紅人。阿廉就曾經自爆，半紅不黑做歌手嘅時候，就欠落一身巨債，因為要登台出show，人靠衣裝免不了買衫添置新裝，所以高峰時期就欠落10幾萬卡數，每個月已經窮到只係還到利息，根本唔可以正常生活，所以考慮轉工。
Photo from from Youtube
直到1999經理人介紹佢入TVB，過程都係有血有淚。經理人同阿廉講，人工只有幾千蚊，一個大男人聽到呢個消息，即時隔住電話喊出嚟。大概每個人光輝嘅背後，都有一段黑曙嘅歲月，但正所謂「黑暗過會是晨曦」，阿廉一直咬緊牙關，不問原因、不問回報，雖然好似一隻無咗掌舵人嘅船咁，但阿廉仍然無放棄自己，深信柳暗花明又一村。
Photo from from Sina
放棄做歌手，卻一直堅持拍劇，無心插柳成為今時今日嘅綠葉王。回望過去，上天為阿廉關咗一扇門，確實有為佢打開另一扇窗。喺TVB出道未夠兩年，阿廉就有機會參與大製作—接拍《妙手仁心2》，跟邵美琪喺劇中譜出姊弟戀，有唔少機會孖住邵美琪一齊登台。其實邵美琪一直都唔喜愛登台賺錢，但為咗幫助好拍檔渡過難關，就齊齊搵真銀，登台幾次後，阿廉就將卡數還清，所以對於好友邵美琪嘅幫助，佢一直銘記在心。
Photo from from Sina
人生可以算到有嘅10年，10隻手指數得哂。阿廉用咗雙倍時間，舊年憑《公公出宮》乸型公公一角打低前輩兼外父姜大偉，奪得最佳男配角，算係一個遲來的春天。發表感人得獎感言嘅時候，阿廉激動話：「上咗年紀嘅人都知我係唱歌出身，呢個獎證明我無轉錯行。」皇天不負有心人，阿廉近年大多擔正主導角色，戲份亦好重，唔再係「TVB御用失蹤王兼罪犯」—只係做因為破產失蹤、殺人放火、推人落樓等茄呢啡角色。
Photo from from TVB
Photo from from Sina
老爺係姜大偉，作為姜家女婿，阿廉其實可以有姜大偉、秦沛等一眾實力前輩「照住」，但佢就從來都無諗過要靠外家上位到電影圈發展，阿廉認真表示「從來都無諗過，如果我唔值錢、無呢個價，你就唔好扶我。」年過半百，出道20幾年，無擺出一幅高高在上姿態，仲自嘲係「有爛鬼骨氣」，阿廉從一而終都係一個堂堂正正、腳踏實地嘅男子漢，有今日嘅成就、得到觀眾嘅喜愛、圈中朋友高朋滿座，就係憑佢真實貼地嘅性格一點一點累積而來。
Photo from chowinglim ＠ ig
曹永廉跟太太今個月底就係結婚11周年紀念，兩人恩愛如昔，曹永廉指自己喺經營婚姻上，無過人之處，但相處之道就係各施其職—太太負責管理家庭、教導小朋友，自己負責賺錢養家，有時間就分擔太太工作，最重要係少說話多聆聽。「好多事情上我好少特別畀意見，尤其讀書教育方面，我都畀太太揸主意，可以減少好多爭拗，男士們都要學吓，兩個人嘅諗法一定有唔同，男人叉隻腳落去一定好多爭拗，你負責搵錢好過喇。」唔單止工作上捱得，阿廉喺夫妻相處上都係處處忍讓嘅好男人，佢口中嘅「無過人之處」，大概係天下男人都要學習嘅優點呢～
Photo from chowinglim ＠ ig
Text：Girlslike Editorial
Photo Source：Pinterest, Sina, Weibo
