汪明荃IG Tag人法再進化！全城熱玩「#汪阿Tag」，連張敬軒都仿效汪阿姐：識tag一定咁tag～！

汪明荃（汪阿姐）自創全新Instagram Tag人法顛覆傳統，以紅色字直接將人名寫喺旁邊，連IG帳號都唔使記，呢個獨特玩法立即引起各大網民注意，唔少明星如張敬軒、古巨基、陸浩、關智斌等等都一齊跟住玩，全城一齊熱玩「#汪阿Tag」，而阿姐呢個玩法已經去到二次進化嘅階段！

尋晚「萬千星輝賀台慶」黃智雯（Mandy）上台跳舞，阿姐就拍下佢唔少照片，每張相都帶有一個字「Mandy」、「Sweet」、「忘我」、「興奮」、「型」、「靚」。

阿姐更加入個人感想「可惜拿不到台慶大（獎）」、同埋介紹自己嘅一身行頭「鑽石30卡全套800萬」、「靚！高貴！閃！」，將Tag人法二次進化，相信又會掀起一陣模仿潮～！

汪阿姐喺上個月9號開設了個人IG，直至現時為止有61篇貼文，咁計法即係平均每天有一個post，主要分享生活同工作照片，玩IG仲密過你同我，可見阿姐對IG嘅熱愛程度有幾高！

阿姐玩IG玩得超貼心，她知道未必每個人都有個人IG帳戶，就為佢地自創咗一套貼心Tag人法，就係用紅色字寫低每一個嘅名字，有時更會加埋頭銜，俾觀眾知道相中人係邊個，就好似上個月佢出席保良局盆菜宴後，佢貼心地一一為朋友們加上名字～！

就連冇一齊合照嘅人都有份享用「#汪阿Tag」！

阿姐呢個Tag人法率先俾陸浩發現，然後立即被仿效，陸浩更賣口乖讚阿姐：「今日台慶綵排，Liza姐教我哋tag相新方法，係愛嘅tag法」，網友們立即留言「你都好跟得上潮流」、「你漏左打職銜」、「d字無lisa姐咁有霸氣」～！

經過陸浩將呢個顛覆傳統嘅Tag人法發揚光大，而家好多明星同網民都跟風，學阿姐嘅獨特Tag人法，包括張敬軒、古巨基、關智斌、姜皓文等等～！

「#汪阿Tag」你今日玩咗未呀？未玩快啲試吓啦～～～（笑）

Text：Girlslike Editorial

Photo source：Instagram