女人打扮全因懂取悅自己：打扮從來都不是為了給別人看，而是想活得更好一點

By Claire on 27 Aug 2019

不追求完美的天秤座，認為世上所有女孩都有著自己獨特的美麗。 Be your own kind of beautiful!

扮靚好似係女人嘅天性，女人追求「變美」係再正常不過嘅事～揀條靚靚嘅裙、塗個顯氣色嘅唇膏～有人打扮係為咗吸引異性，有人打扮係為咗滿足自己～係呢個講求外表嘅社會中，如果你仍然覺得打扮好麻煩，唔知點解女人需要打扮，呢篇文章可能可以解答到你嘅疑慮~因為打扮唔一定係為咗比別人睇，而係為咗令自己活得好一點～

Photo from Pinterest

#打扮是禮貌的基本

你大概唔會想見到隔離個同事每日頭都冇洗、面青口唇白咁樣返工吧！係日本、韓國等由其注重外表嘅國家，打扮好自己其實係基本嘅禮儀，更係對別人嘅尊重～無論返工、約會都會選擇尊重場合嘅衣服同埋妝容～雖然唔係叫你落街買嘢都要著晚裝咁誇張，但至少洗乾淨塊面、塗個唇膏令自己唔似病人、著套唔似睡衣嘅衫褲，至少你唔會預計得到幾時會撞到姨媽姑姐或者係前度啊～！

Photo from Pinterest

#打扮能增加自信

有人話面試需要打扮正式一點、好好化一個妝，因為咁樣睇落會精神啲～咁點解平時就唔需要呢？打扮過嘅你都會知道打扮後人會有自信啲，係街上行走時頭都會抬得高啲，處事更加游刃有餘，得心應手～生活自然會更加順利～！

Photo from Pinterest

#展現女性魅力，散發獨特氣質

女性打扮唔一定要花枝招展，打扮得超級女性化，而係尋找自己最喜歡、最舒服嘅風格～可能係文青風、復古風、歐美風、街頭風～第一印象通常都係由外貌產生，透過一個人嘅衣著打扮可以大概估到佢嘅性格～其實你未必要跟隨潮流，可以發揮創意創造屬於自己嘅風格，展現個人獨特嘅魅力！

Photo from Pinterest

#證明女性也有獨立經濟能力

有人覺得女人唔應該「賺錢買花戴」，但如果錢係女人辛苦揾返嚟又有何不妥？今時今日好多都市女性都有獨立經濟能力，係唔影響日常生活下買化妝品、衫褲鞋襪，其實都係想慰勞一下辛苦工作嘅自己，享受打扮嘅樂趣～令自己每次照鏡時心情都會好啲，然後跟自己講聲「加油！」

Photo from Pinterest

#換個妝扮變換心情，令自己每天過得更開心

打扮係每日需要做嘅事，但唔一定每日都要著得一模一樣！其實打扮可以隨著心情、天氣、季節而改變，冬天可以著得比較沉實、春天就可以著得比較色彩繽紛～每日唔同嘅打扮除咗俾人煥然一新嘅感覺，仲可以俾自己新鮮感，向昨天嘅你講bye-bye，重新開始美好嘅一天！

Photo from Pinterest

#從外表開始整理好自己的人生

有人覺得打扮好麻煩，其實的確係，打扮係需要無限創意同心機，由每朝早刷牙洗臉、選擇當日嘅服裝、思考適當配件、考慮合適妝容、晚上去另一場合又要思考點樣轉換外表以尊重場合，要做得好的確唔係一件容易嘅事！但如果你連自己外表都整理唔好，又點樣整理好自己嘅人生呢？打扮好證明你係一個有計劃、有條理嘅人，亦可以好好咁管理自己人生～