婚姻結束也是一場學習！學陳貝兒、陳煒、黃心美的正面愛情態度，活得比從前更精彩～

有唔少女性都對「離婚」這個字眼依然感恐懼，覺得無面面對婚姻失敗，不過離婚其實都係一場學習。就好似演藝圈入面陳貝兒、陳煒、黃心美三位女性都經歷過離婚，不過事情並無令佢地一蹶不振，宜家活得比婚前更加好，佢地正面嘅態度非常值得大家學習～

# 陳貝兒

陳貝兒2017年同圈外老公黃國棟離婚，結束6年婚姻，陳貝兒曾經話過自己係一個愛情至上嘅女仔，至今仍對愛情充滿憧憬：「其實只要係自己鍾意嘅，嗰個就係最好。其實唔需要搵一個完美嘅，只需要搵一個自己真正係最鍾意嘅，然後大家一齊努力進步，一齊進化成為最好嘅人。」

Photo from chanjanis@Instagram

陳貝兒覺得枕邊人唔一定要完全明白自己，但一定要識得欣賞自己，即使宜家佢未搵到新一段感情，但佢樂意聆聽唔同嘅愛情故事，相信世上有真愛：「唔知道今日會遇見咩人、發生咩事。我淨係知道外面陽光幾好，唔好辜負咗今日。生活，就係每日游走於喜怒哀樂之間 。自己揀！」

Photo from chanjanis@Instagram

當年佢宣佈離婚，態度依然正面，佢話：「我相信每一個喺我哋生命中出現嘅人都有佢特別嘅原因。有啲可能會留得來啲、有啲可能只係一個過客。不過無論呢一刻你身邊有冇人，只要珍惜眼前每一個開心片段、珍惜每一個當下、繼續相信。愛，一定會喺最適當嘅時候，喺世界某一個邊端出現。」

Photo from chanjanis@Instagram

# 黃心美

黃心美2010年同拍拖5年嘅男朋友Thomas結婚，不過後來喺2015年離婚，結束10年戀情，兩人係異地戀，由拍拖到結婚都唔係一齊生活，直到離婚都連對方嘅收入都唔清楚，而佢亦無向律師提出追討贍養費：「就算他給我2000萬，可以彌補到我的傷痛嗎？」

Photo from scarlett328@Instagram

不過離婚後嘅黃心美，依然期待新戀情，但宜家佢抱住隨緣嘅心態，唔強求。佢曾經話過：「計劃得太長遠，到頭嚟又係一場空，所以唔會諗咁遠，開心就好。」

Photo from scarlett328@Instagram

# 陳煒

陳煒同前夫顏志行嘅婚姻只維繫咗4年就結束，不過離婚之後佢無公開消息，反而同前夫不時喺電視節目入面亮相。陳煒用「做朋友好過做夫妻」去形容兩人嘅關係：「感情上大家都有付出過，不可以去太過計較誰對誰錯，要用正面的態度去面對這件事。」

Photo from alicechanwai@Instagram

Text：Girlslike Editorial
Photo Source：Instagram