碧咸和 Victoria 相愛廿年牽手跨過婚姻危機，曾重新訂下結婚誓言：「低潮和困難都是婚姻的一部分」

By Claire on 10 Sep 2019

不追求完美的天秤座，認為世上所有女孩都有著自己獨特的美麗。 Be your own kind of beautiful!

萬人迷碧咸和老婆Victoria係圈內出名恩愛纏綿，育有三子一女嘅佢地擁有一個幸福美滿嘅家庭，不時係社交平台分享溫馨家庭照，模範家庭令人羨幕不已～但原來美滿婚姻得來不易，由拍拖到結婚感情一直不被外界看好，更屢傳婚變消息，經歷唔少婚姻低潮。二人結婚20週年曾攜手修補當中裂痕，讓我地回顧一下佢地童話式愛情故事，細看佢地點樣面對婚姻中最艱難嘅時刻～

Photo from ig @ victoriabeckham

碧咸與Victoria嘅愛情故事要回到1996年講起～碧咸當年正身處格魯吉亞參加世界盃預賽，佢夜晚係酒店打開電視，咁啱電視正在播出有Victoria在內嘅女子組合「Spice Girls」名曲「Say You'll Be There」嘅MV，見到身穿黑色緊身衣嘅Victoria係沙漠中起舞，碧咸眼前一亮，目光一直離唔開Victoria～更加向同房嘅隊員講：「我今晚一定要見到佢。」

Photo from ig @ davidbeckham

Photo from Pinterest

碧咸最後未得償所願，直到一個月後二人再次係公開場合再會，碧咸當然立即把握機會，最後終於得到有Victoria電話號碼嘅小字條～碧咸形容字條係佢一生中嘅寶藏，直到而家仍然好好珍藏著，「那天回家後，我把號碼寫在數張紙條上，放在屋內每個角落，以免弄失。」

Photo from ig @ victoriabeckham

終於到第一次約會，碧咸帶Victoria去一間好少客人嘅中菜館約會，二人情投意合，傾到餐館關門都唔願意告別～之後Victoria要去美國參加巡迴演唱，二人要暫別一段時間，碧咸立即暖男上身，每次Victoria轉酒店都會送上一大束花俾佢，加上每日送上一枝紅玫瑰，難怪得到美人芳心～拍拖期間二人不時要分隔兩地，碧咸為咗能見多Victoria一面，試過專程飛往美國係候機室相聚一小時，再獨自飛返英國；更經常飛到Victoria表演嘅地方陪伴左右，只要能夠相聚，碧咸不介意一切，碧咸更形容當年二人初吻「那晚就像全年夢想成真。」真係好似王子與公主嘅愛情故事一樣咁浪漫啊～

Photo from ig @ davidbeckham

兩年多後二人終於係愛爾蘭古堡進行婚禮～當年婚禮上碧咸和Victoria都感動流淚，終於堂堂正正結成夫妻～Victoria先後為碧咸誕下三子一女，專心養育子女之餘更積極發展個人時裝品牌，成為能幹嘅職業媽媽～！但幸福嘅生活直到2004年出現裂痕，碧咸被傳媒揭發和助手有染，相隔僅一星期，又被傳媒影到和澳洲女模特兒深夜外出。面對種種指控，夫妻雖然並冇作出正面回應，但丈夫一夜間成為全城熱話，身為妻子心情當然唔好受，成為婚姻中最艱難嘅時刻。但內心強大嘅Victoria好快就走出陰影，曾講過：「我沒有流過一滴眼淚，我始終相信 David（碧咸）。」Victoria比誰都了解自己丈夫，而佢亦清楚家庭破裂會對孩子帶嚟陰影，所以佢選擇俾丈夫、和自己一次重新開始嘅機會～Victoria多年後曾解釋：「我讓 David 成為最好的人，David 也讓我成為最好的人。我們兩個是共同體，比我們單獨一個人會更好。」

Photo from Pinterest

Photo from ig @ davidbeckham

碧咸係兩年前接受電台訪問，坦承當年的確犯咗唔少錯，但佢認為婚姻並唔容易，重點係點樣走過一個又一個難關「低潮和困難都是婚姻的一部分，我們會以家庭為單位一同度過。」碧咸更大爆二人結婚多年後曾「二度結婚」，重新訂下結婚誓言，形式非常私隱，係只有6個人嘅家中進行。一個有經歷嘅男人的要剖白婚姻的確唔容易，二人係經歷風雨後重新開始，重新認定對方為終身伴侶～