維繫感情只靠一顆真心！胡蓓蔚單立文相愛逾20年仍好sweet，豹哥：如果要比心機維繫，就不是婚姻了！

豹哥單立文(Pal)同胡蓓蔚(豹嫂)呢一對模範夫妻由拍拖到結婚到宜家已經超過二十年，兩個人可以咁穩定一齊咁耐並唔簡單，當中到底有咩相處秘訣呢？

豹哥豹嫂拍拖11年，結婚10年，感情一直都無出現低潮，豹哥話原因係因為佢本身就無好多朋友，朋友就只有豹嫂，佢話：「朋友是她、老婆又是她，她把我take care得好好，對於這樣的女人，夫復何求呢？」豹哥又指，豹嫂曾經喺低潮時候同佢度過艱難嘅時期，令佢好珍惜宜家收成期享受嘅日子。

Photo from 曾經有個好有名嘅相士訪問豹哥，話佢同豹嫂如果上年無下一代嘅話，佢地嘅關係到2020年就會出現小三。豹哥面對相士嘅預測，唔單止唔擔心，佢話佢反而想有小三，想睇下自己可唔可以經得起考驗。

有好多人都會疑問，到底一段感情、一段婚姻要點樣維持先可以穩定同長久。而豹哥就覺得，如果要比心機keep就唔係婚姻！因為婚姻其實係「lifetime partner」，佢話：「你對她好，真是衷心對佢好，每分每秒都為她著想，每個moment都想她笑、想她開心，先至是真正的結合，都是出自真心，不是玩玩的、或者有其他外來因素而影響到你的諗法。 」

豹哥豹嫂咁多年都深愛對方，無特別維繫嘅方法，就只靠一顆「真心」，兩人早已經將對方視為終身伴侶，全心愛對方，為對方好。今時今日提到婚姻、終身伴侶，又有幾多人係真正明白筒中嘅意義呢？

Text: Girlslike Editorial

Photo Source: Instagram