不平凡的身份平凡的愛！平民女子嫁入皇室，日皇明仁夫婦廝守半世紀的愛情～
搵到心愛自己嘅白馬王子，從此過上幸福美滿嘅生活，呢種童話般嘅愛情故事，世界上並唔係完全無～如果要搵現代版「灰姑娘」，日本嘅美智子皇后可能就係其中一位代表，佢同日皇明仁嘅愛情故事，歷盡風雨，靠雙方對彼此嘅愛一直相伴到現在接近60年，好令人羨慕！
現任日本天皇明仁作風開明又親民，所以深受國民愛戴～當年東北大地震期間，天皇明仁罕有地喺電視發表公開演說安慰民心，備受讚賞，而咁樣一位和藹可親，處事低調嘅日本天皇，原來都曾經因為「愛」而不惜打破皇室傳統。60年前仲係保守嘅社會氛圍下，佢選擇娶平民出身嘅美智子為妻子，成為現代日本歷史上第一位同平民結婚嘅天皇！
# 網球場上的愛情史
日皇明仁同皇后美智子嘅相識好浪漫，甚至被日本傳媒稱為「網球場上的愛情史」～1957年嘅夏天，當時仲係皇太子嘅明仁喺一次網球比賽入面遇上美智子，喺對賽嘅過程中對美智子一見鐘情，之後就通過朋友嘅介紹識咗佢，仲成日借機約美智子打網球，而兩人亦因為有住一樣嘅喜好，感情快速升溫，最後仲發展成為戀人～
# 求婚引起風波
皇太子明仁深愛住美智子，所以翌年就急不及待要向佢求婚，不過呢個舉動就引起咗好多風波，因為大家都覺得日本皇太子一定要搵皇室女子做伴侶，先算門當戶對～美智子雖然家境不俗，又知書識禮，不過身為民間女子嘅佢依然唔係一個「合格」嘅人選，就連當時嘅皇后香淳都對個囝嘅決定覺得好不滿。而美智子嘅父母亦覺得自己個囡自身條件唔差，何必要嫁到皇室被欺負，都唔願意點頭答應，最後要明仁天皇嘅父親昭和天皇出面調停，並且親自批准呢門婚姻，二人先可以喺1959年結為夫妻～
# 嫁入皇室後患上失語症
嫁入皇室後嘅美智子依然承受仲沉重嘅壓力，平民出身嘅佢要適應凡事都有規有矩嘅皇室生活相當唔容易。再加上皇后香淳 (皇太子明仁嘅母親）給予佢無情嘅對待，令到佢一度患上失語症，幸好有丈夫一直守候喺身旁，做佢嘅後盾，以及大眾嘅支持，先逐漸康復。
# 讓「平民」走進皇室 讓皇室走進「民間」
後來皇太子明仁繼位成天皇，而美智子亦成為皇后。美智子為冰冷嘅皇室帶來一絲溫暖，佢喺皇室入面過著平民一樣嘅婚姻生活，做一個會親自下廚嘅皇后，仲為家人預備溫馨嘅晚餐，亦唔會將小朋友交比奶媽照顧，而係會自己肩負起照顧同埋教育孩子嘅責任，並陪伴佢地一同成長～
# 不平凡的身分 平凡的愛
日皇明仁夫婦貴為日本皇室最崇高嘅象徵，但生活日常就好似一對平淡嘅夫妻，互相扶持相伴到白頭，佢地平日出席公開活動嘅時候都會被影到溫馨嘅互動～
早前，佢地出席於東京赤坂御苑舉辦嘅園遊會，當日落住毛毛細雨，日皇明仁無讓身旁隨從代為撐傘，反而係一手撐住遮，一手拖住妻子美智子，日皇明仁仲將雨傘傾向美智子嗰面，為免妻子被雨淋濕，而自己嘅右肩一早已經被雨水沾濕～因為呢個舉動，大家都大讚日皇明仁細心體貼，而網民們都好羨慕佢地嘅深情。
現時已經年屆84歲嘅日皇明仁，早前已宣佈將於明年4月退位，好好同愛妻美智子安穩共渡餘生，過平靜嘅生活～兩人年事已高，對於身後事嘅安排，皇后美智子於3年前81歲生日時表示自己係平民出身，死後將唔會選擇同丈夫合葬，仲話足一生可以好似普通人一樣同深愛嘅人相守一輩子已經好滿足，消息令大家都好驚訝。
兩人為彼此犧牲、包容，攜手共渡一生，呢種一定就係每個女仔都憧憬嘅愛情！
Text： Girls editorial
Photo Source：pinterest, instagram, weibo
