「已讀不回」不被發現？有傳Whatsapp將推出「度假模式」，成功隱身之餘又不怕尷尬～

By Michelle on 27 Nov 2018

Digital Editor

WhatsApp功能日新月異，早排先推出Sticker功能，近日有傳會推出度假模式（Vacation Mode）新功能。故名思義就係當你開啟渡假模式後，用家就可以喺對方唔知情嘅情況下，將群組對話靜音之餘，又唔會畀人見到你「已讀不回」，要隱身不留痕話咁易～

Photo from lovedramafans @ ig

上班一族辛酸史包羅萬有，其中一樣必定係放假都要24小時on call，老細搵你嘅話，秒回先係好員工。香港地搵食艱難，唔想無咗份工就要預咗放假都要理公司嘢，都咪話唔攰；WhatsApp內n個「朋友圈」，不時會搞聚會，明明唔太熟唔係幾想去，諗住唔出聲諗住可以避過一劫，但畀人見到你「已讀不回」被點名，尷尬癌即時發作，最後又係要硬住頭皮參加～或者日後嘅「度假模式」會幫你脫離老細同煩人嘅魔掌～

Photo from lovedramafans @ ig

平日使用Whatsapp時，想群聚唔會無時無刻響影響工作，我哋可以點選「靜音」功能，新訊息唔會不停彈出推送通知，但「美中不足」係聊天室同應用程式圖案上都會有「未讀」標記。

最近就有消息指，WhatsApp將會推出度假模式（Vacation Mode），用戶可以自行將群組暫時「封存」，而已封存嘅群組訊息通知，都唔會喺對話列表中置頂顯示。另外，當用家開啟「渡假模式」後，群組唔會自動出現喺對話列表嘅頂部，而且群組內嘅其他成員亦唔會知道你已經將群組較做靜音或者未讀訊息。換言之，畀人見到你已讀不回嘅情況有機會大大減少！