疼老婆的男人才會成功！娛樂圈中的影帝級愛妻號，與老婆風雨同路多年，不離不棄始終如一！

有人話娛樂圈係一個大染缸，入面諸多誘惑，好易就會失去初心，而男女藝人之間成日會傳出緋聞同埋各種感情糾紛～不過，當中都有一班絕世好男人，係大家眼中一等一嘅愛妻號，幾乎無緋聞，而咁啱佢地都係影帝級人馬，唔怪得人地都話「錫老婆嘅男人先會成功！」啦～

# 梁家輝夫婦

梁家輝喺娛樂圈打拼多年，憑住精湛演技先後4次奪得金像獎「最佳男主角」殊榮，不過名成利就嘅他都曾經有過失意嘅時候，而當時就係太太江嘉年喺身邊默默支持佢～

佢話自己喺最失意潦倒嘅時候，有一個美麗嘅女人願意嫁比佢，拖住佢嘅手走過風雨，因為呢份矢志不渝嘅愛情，令梁嘉輝更加珍惜呢位為佢付出一切嘅太太，每當外界對太太嘅樣貌身型有所批評，性格內斂沉穩嘅都會挺身而出霸氣護妻～

喺佢地結婚20週年嘅時候，梁家輝就送比太太一隻鑽戒，朋友仲笑佢話：「邊個會買這麼大的鑽戒送老婆？」佢話：「這樣的鑽石，只有我太太才配得起。她是我心目中的鑽石女人，隨著時間，依然美麗，不斷升值。」

「一對戀人，頭一兩年拍拖，那是戀情；之後的十年八年，是感情；如果三十年後你仍會拉她的手上街，那才是真正的愛情。」雖然已經係老夫老妻，但係結婚咁多年，都依舊咁恩愛，真係好令人羨慕～

# 周潤發夫婦

周潤發同樣係出名嘅愛妻男，勇奪3屆影帝嘅佢，雖然貴為巨星，但平日作風低調，而且相當親民～

同余安安經歷過一次婚姻之後，發哥同現任太太陳薈蓮一同攜手走進婚姻第32個年頭，婚後發哥表示喺娛樂圈入面見盡美女，反而更著重另一半嘅內涵，而佢嘅太太就係一位絕佳嘅賢內助，一直從旁協助丈夫發展事業～

二人曾經歷痛失愛女流產之痛，至今膝下無兒，不過都無影響倆公婆嘅感情，反而令佢地嘅婚姻更加牢堅不摧～而發哥仲透露太太係佢嘅財產管理人，所有收入都會交比太太打理，據知發哥嘅身家高達14億，足見佢對太太嘅信任！

# 劉青雲夫婦

仲記得劉青雲當年第三次奪得金像獎影帝，喺台上嘅「太空船宣言」嗎？佢向妻子郭藹明深情告白話：「「多謝我太太，每次當我開着宇宙飛船，不知飛到哪裏去時，你總有辦法令我安全返回地球。」呢段超真摯嘅話令人相當感動！

本身擁有超高學歷嘅郭藹明係1991年香港小姐冠軍，入行之後就開始接拍電視劇，仲同劉青雲喺《大時代》入面相識相愛，結婚20年，婚後都經常被拍到十指緊扣外出約會，甜蜜程度就好似初初熱戀嘅情侶一樣：「太太是我人生最好的禮物，她很聰明，我喜歡甚麼不喜歡甚麼，不用說她都一清二楚！」

而為咗專心照顧家庭，有傳郭藹明更放棄前途一片光明嘅NASA工程師一職，甘願做丈夫背後嘅女人，見到太太無私付出，劉青雲都相當努力工作，為給予太太最好嘅生活，仲將財政大權都交到郭藹明手上！

# 張家輝夫婦

張家輝由當年嘅「化骨龍」到今日憑住電影《證人》榮獲8項影帝殊榮，之後再憑《激戰》創下事業高峰，相信喺佢心入面最感謝嘅人就係結婚15年嘅太太關詠荷：「太太是我一生中最大的收穫！」～

當年關詠荷同張家輝嘅關係一直被外界認為係「女尊男卑」，不過無礙兩人認定彼此為終生伴侶，關詠荷堅信自己丈夫會有出頭天，結果證明咗佢嘅眼光無錯，張家輝亦傾盡所有為家庭奮鬥！

喺娛樂圈呢個五光十色嘅地方，可以抵抗各種誘惑，同另一半攜手走過各種風雨真係好難得，以上呢4對夫婦絕對係婚姻嘅最佳模範～

Text： GirlsLike editorial

Photo Source：weibo, instagram