破最高齡入圍紀錄！72歲劉江憑《平安谷》首獲提名視帝，被網民大讚演活自私村長一角～

嚟到年尾，又係TVB台慶嘅大日子～日前TVB就公佈咗「萬千星輝頒獎典禮」各個獎項提名名單，而今年視帝之爭非常激烈！除咗有早前率先獲選星馬視帝嘅袁偉豪之外，仲有憑住《跳躍生命線》大受歡迎嘅馬德鐘、一向人氣好高嘅馬國明，同埋重返TVB演出嘅張衛健等，接下來呢位更係備受矚目，就係入行50幾年首次提名視帝嘅劉江～！

Photo from 《平安谷之詭谷傳說》劇照

今年72歲嘅劉江，憑劇集《平安谷之詭谷傳說》喺今屆「萬千星輝頒獎典禮2018」首度獲提名最佳男主角，成為歷年來最高齡嘅最佳男主角入圍演員，打破埋King Sir（鍾景輝）喺2005年嘅時候以68歲之齡憑劇集《甜酸爺爺》入圍嘅紀錄。

Photo from 《平安谷之詭谷傳說》劇照

提到入圍角色，其實劉江喺《平安谷之詭谷傳說》入面飾演陸金谷一角嘅戲份極重，角色具有挑戰性，為人自私，重視利益，仲為求目的不擇手段，不過隨住劇情發展，陸金谷嘅想法起咗重大變化，到結局時痛改前非，有好多觀眾都大讚劉江演出入型入格！

Photo from 《平安谷之詭谷傳說》劇照

因為2013年劇集《拳王》中一張截圖，令入行50幾年嘅劉江近年喺網絡上爆紅，而原圖嘅對白「X！講呢啲」其實唔係出自劉江口中，是只係咁啱劉江合埋咗對眼，個樣又有啲得戚咁笑，所以網友就幫佢配上對白，令到該圖喺網上瘋傳～

Photo from 《拳王》劇照

同年，佢就喺「萬千星輝頒獎禮2013」上獲頒「傑出藝員大獎」～最有趣係佢喺《平安谷之詭谷傳說》大結局入面，仲親自笑住講「講呢啲」呢句金句抽自己水！

Photo from 《平安谷之詭谷傳說》劇照

究竟今次劉江可唔可以打低其他對手，一嚐視帝滋味，大家就期待一下啦！

Text：GirlsLike Editorial

Photo Source：TVB