「男人做到嘅事，女人都可以做到」港版羅拉現身《女人四十》，感人故事體現獅子山精神～

By Aisa on 28 Nov 2018

一個追逐夢想的女生，深信未來是屬於相信心中美夢的人。

社會對女人有種種標籤，令大家都對「老」呢個字充滿恐懼，而前日播出嘅《女人四十》入面，主持田蕊妮就同一班嘉賓大談「男女大不同」，仲請嚟「港版羅拉」朱芊佩用行動證明女人都可以勝任男人主導嘅行業，大班網民睇完之後都話：「羅拉令我更加知道女人可以好強大！」

Photo from 《女人四十》

為咗體驗女人到底可唔可以做男人做嘅工，阿田換上一身運動裝，同有「港版羅拉」之稱嘅朱芊佩喺街頭體驗搬貨工作～一開始「羅拉」就叫阿田搬三箱公仔麵，25KG嘅米、油等等，阿田笑稱好彩自己平時有做開運動，如果唔係對於女仔嚟講呢啲野真係太重，拎唔起～

Photo from 《女人四十》

阿田提到一開始見到「港版羅拉」嘅新聞，仲以為係炒作～問及點解要揀運輸呢個男性主導嘅行業時，「羅拉」回答：「因為搬運冇咁多是非，人情世故比較簡單，啲人真性情啲，唔洗怕勾心鬥角⋯⋯」

Photo from 《女人四十》

「羅拉」話做搬運係想證明「男人做到嘅事，女人都可以做到」！而且剛入行啲野都「焗住」要做，如果唔係就會係屋住，無飯食～有一段時間，佢更加要瞓貨車、冬天喺果欄沖凍水涼⋯⋯

Photo from 《女人四十》

阿田問：「你唔驚㗎咩？你個樣又生得唔差？」，「羅拉」話就：「冇得揀⋯⋯一係瞓車斗，一係瞓街」搞到阿田聽完都眼濕濕，大概係覺得佢好可憐。而羅拉就好豁達咁話：「除咗含住金鎖匙出世嘅人，冇人一生落就乜都有。要靠自己努力先可以得到，努力活好每一天」，之後用咗一句「You will when you believe」激勵女性努力：「我得，你都得！」