大仔5歲生日冧媽咪！陳豪陳茵媺為大兒子辦溫馨生日派對，Aiden向媽媽大派糖：謝謝你生下我～！

陳豪同陳茵媺（Aimee）2013年結婚後五年抱三，育有大仔Aiden、二仔Nathan同細女Camilla，兩夫妻嘅恩愛程度閃盲人外，一家五口都超幸福溫馨～原來唔經唔覺大仔Aiden已經5歲，Aimee為佢搞咗「星球大戰」主題生日party，Aiden更冧媽咪：「早晨媽咪，謝謝你生下我」嘩，甜到甩牙啦！

Aimee淡出娛樂圈後專心做好媽媽好老婆，全力照顧3個小朋友，佢每年都會搞盡腦汁為孩子舉辦唔同主題嘅生日party，今年Aiden5歲生日就以星球大戰做主題，有個超靚生日蛋糕同曲奇，Aimee真係好有心思！

除咗食物外，Aimee仲為小朋友預備咗星球大戰嘅cosplay衫同光劍等，大仔扮黑武士擺pose影相夠型，細女就扮莉亞公主超級可愛！

為咗搞呢個咁靚又特別嘅生日派對，Aimee準備咗幾個晚上仲搞到冇覺好訓，不過見到小朋友臉上嘅笑容就咩都值得，Aimee真係一個好媽媽！

見到媽媽咁辛苦，大仔Aiden就出動冧媽咪，一早起身就同媽咪講：「早晨媽咪！多謝你生下我！」甜到呢～

Aimee亦表示好開心：「親愛的，你是上帝給我的最好禮物中的第一個，我簡直不敢相信我有這麼一個了不起兼成熟甜美的男孩。你是媽媽的一切，讓所有不眠之夜和所有的犧牲都值得！5歲生日快樂我的小Jedi！我愛你無論月球轉到那一面......再循環100次！ 」

陳豪同陳茵媺結婚5年仍恩愛如初，而家仲有3個可愛又孝順嘅仔女，真係好令人羨慕啊！

Text：GirlsLike Editorial

Photo source：Instagram