「他們是推動力，令我每做一分一秒都是值得。」薛家燕紅館開騷，子女上台支持，家燕感動落淚～

Hot Topics

By Aisa on 06 Dec 2018

一個追逐夢想的女生，深信未來是屬於相信心中美夢的人。

一連兩場「薛家燕愛你無限60年演唱會2018」正式喺紅館開騷～家燕姐嘅3個囝囡都有前來，上台送花獻吻，仲話媽媽喺佢地心目中唔單止係全能藝人，仲係女超人，場面非常感人！

Photo from 薛家燕@Weibo

演唱會最吸引人嘅地方，除咗係歌手嘅演出之外，當然仲有嘉賓環節啦～家燕姐慶祝入行60年，於12月4-5連續兩日喺紅館舉行演唱會，佢嘅3個囝囡都有到場，仲上台送花獻吻，向媽媽表達感謝，佢地話媽咪喺佢地心目中唔單止係全能藝人，仲係個女超人。

Photo from 薛家燕@Weibo

雖然幾姐弟喺單親家庭入面長大，但家燕姐令佢地感到好多溫暖同埋愛，佢地好感恩可以有一位咁偉大又錫佢地嘅媽媽～

Photo from 薛家燕@Weibo

而三個囝囡仲即場送上一曲「You Raise Me Up 」，即刻搞到家燕姐感動到喊，囝囝就遞上紙巾，孻女就幫家燕姐抹去淚水，一家真情流露令人動容～

Photo from 薛家燕@Weibo

當囝囡獻唱完離開舞台之後，家燕姐就感觸咁話:「3個仔女出場令我好感動，他們小時候被人說是我的包袱，連黎小田都這樣講，其實他們是一個推動力，令我覺得每做1分1秒，就算出幾多汗，一切都值得。子女都長大，他們今次很支持我的演出，特別是珊珊（大女石祐珊），我出廣告舉行選婿大會，其實想提醒她應該是時候要結識男朋友。」家燕姐感慨萬千續道：「60年來經歷風風雨雨，但非常值得，我日睡4小時，經常被問不辛苦嗎？我希望做個負責任的媽媽，工作就是我的推動力，我不是不會累，只是不可以累。」