陳煒曾為婚姻放棄事業！回復單身後事業更精采，成《萬千星輝》視后大熱～

By Aisa on 13 Dec 2018

一個追逐夢想的女生，深信未來是屬於相信心中美夢的人。

陳煒憑住TVB劇《宮心計2深宮計》所飾演嘅太平公主一角喺《萬千星輝頒獎典禮2018》獲提名「最佳女主角」同埋「最受歡迎電視女角色」。喺《宮心計2》入面佢雖然係扮演反派，但深受觀眾喜愛，大家都認為今次視后之位，會係佢、《三個女人一個「因」》嘅黃智雯同埋《BB來了》嘅李佳芯之爭。唔好睇陳煒宜家事業咁成功，其實佢以前曾經為咗愛情而放棄演藝事業，但係婚姻最後都係敵不過考驗，回復單身後嘅佢事業反而更精彩～

Photo from alicechanwai@Instagram

45歲嘅陳煒，當年係亞洲小姐冠軍，1996年加入亞視，並且被力捧為當家花旦～2008年，佢同台灣商人顏志行結婚，並離開香港跟隨丈夫去到當地生活，因此而放棄演藝事業，闊別娛樂圈足足4年，一直到2012年離婚之後先回到香港轉投TVB復出。

Photo from alicechanwai@Instagram

陳煒曾經坦白過自己其實一直都好熱愛演藝工作，從來無諗過放棄夢想，只係當年婚後要跟隨前夫到異地生活，逼於無奈之下只好告別演藝圈～不過佢講過婚後嘅生活只係圍繞住丈夫，令佢覺得失去自己。

Photo from alicechanwai@Instagram

可惜婚姻最後都係敵不過考驗，佢表示婚後生活淡如水，佢每日都只係喺屋企到打理家頭細務，過住好似家傭一樣嘅生活，而且老公終日忙於工作，兩人性生活不協調：「當日隨丈夫去台灣已是放棄所有了。分開的主要原因，可能是因性格，或許我真的很悶，而丈夫是百份百的工作狂，將我的位置放得較低。」種種分歧導致關係最終破裂。