向全港觀眾宣布結婚！蕭正楠黃翠如年中已簽紙兼旅行結婚，自爆第一次求婚失敗～

By Aisa on 17 Dec 2018

琴日就係一年一度嘅大台盛事「萬千星輝頒獎典禮」，當中令人開心嘅除咗有各位努力已久嘅藝人拎獎之外，當然唔少得TVB一對金童玉女嘅喜訊。蕭正楠喺得獎嘅時候，向全港觀眾宣布：「黃翠如係我太太」令大家都非常驚喜！佢仲透露其實同翠如喺年中嘅時候已經簽紙結婚，仲喺一個好靚嘅國家行禮，佢一直都思考緊要點同大家分享呢件喜事，昨晚嘅頒獎禮係一個好好嘅機會比佢一次過同全港觀眾，以及關心翠如嘅朋友交代～！

Photo from TVB

今年喜事特別多，有鄭嘉穎同陳凱琳結婚，又有陳展鵬同單文柔拉埋天窗，蕭正楠話每次想公開都比人捷足先登，而昨晚頒獎禮正好係最合適嘅時間比佢公布喜訊︰「好多謝我身邊所有嘅藝員同事，因為頭先嗰刻比咗好大嘅support我，因為我自己好驚，要將呢件事同全香港嘅朋友講，多謝大家嘅衷心祝福！」

Photo from TVB

而各位觀眾最好奇嘅當然係求婚過程啦～蕭正楠就自爆第一次求婚失敗：「咁我自己『懶醒』，好似好浪漫咁，諗住喺架過山車度同佢求婚。不過其實佢好驚，但都肯陪我玩，咁我諗住擺個最靚嘅pose，攞定戒指就想講個啲感人嘅說話啦，點知係上面嘅過程，佢已經驚到成個人疆咗，死都唔郁。」翠如就係唔知情嘅情況下被求婚，而蕭正楠第一次嘅求婚就因此失敗～！

Photo from wongtsuiyu＠Instagram

而被問到公開婚訊開唔開心，蕭正楠就話：「好開心啊！終於可以將呢件事話比大家知，因為關心我同翠如嘅朋友、家人成日都問我地幾時結婚，話唔好拖女仔咁耐。我梗係知啦，一個咁好嘅女仔梗係想快啲娶佢，但你都要揀個好timing㗎嘛，咁終於比我揀到今日（16日）同大家公開！」擺酒方面，蕭正楠指兩人2019年都會非常忙，所以仲未計劃，要再討論一下。

Photo from TVB

而翠如BB就喺凌晨於IG上憶述蕭正楠求婚嘅經過，並上載咗兩人戴上餐具戒指拖手嘅照片：「某時，某地。他在過山車上向我求婚，我在河邊向他求婚。某時，某地。沒有衣香鬢影，沒有氣派場地，就連一對合尺寸的戒指也找不到，然後我們在一個鄉村小市集，找到一對用餐具弄出來的小戒指⋯⋯ 就這樣吧。那一刻，我們什麼也沒有，但我們擁有了對方。證婚人問我們，為什麼是對方？他說，她是那一個，假如到了下輩子，她遺忘了我，我要大力拍拍她的頭，她就會記起我，然後我們又再在一起，她就是那一個人。我說，他是那一個，每次我跌倒，他總是坐在我身邊，讓我哭着說流血很痛，到靜止下來，然後拖起我，繼續帶着我走，他就是那一個人。我們給對方的，是陪伴的承諾。沒有奢華的浪漫，但足夠。我們不是羅大樹和花萍。我們不是馮汐然和顧成雙。我們是蕭正楠和黃翠如。那一天，天空出現一道彩虹，這是最好的祝福。」