踏上視后之路全靠自己！李佳芯冒子宮下垂風險演《BB來了》，靠踏實幹勁闖出一片天～！

李佳芯（Ali）昨晚憑《BB來了》唐恬兒一角封視后，佢喺劇中成功演繹新手媽媽的無奈同辛酸心情，成功為佢帶來「最佳女主角」一獎，Ali除了演技細膩精湛外，現實中佢的性格亦十分討好，難得如此有觀眾緣～！

Ali昨晚上台拎獎時一度眼濕濕，除了感謝一班工作人員同允豬外，佢亦鼓勵努力為夢想打拼的各位：「我想講我唔係一個贏在起跑線嘅人，從來唔知咩叫前人種樹、後人庇蔭嗰隻感覺，我只係一嚿飯，做好每一個角色，做好每一樣嘢，我淨係知道要成功只可以靠我自己，如果大家行到好攰好氣餒嘅時候，記住當你唔係得你一個，有好多人都係默默咁行緊呢條路，你唔係自己一個人。」

Ali自小在屋邨長大，入娛樂圈早期為有線拍攝過唔少綜藝節目，2012年轉名李佳芯改簽TVB合約，並被安排主持《學是學非》，因樣子甜美性格討好而獲得唔少觀眾關注。

因自小在較平民嘅環境中長大，Ali養成貼地踏實的性格，成為公眾人物後佢依然同家人同住公屋、又經常素顏乘搭公共交通工具，親民冇架子令佢十分有觀眾緣。

後來Ali出演過唔少劇集，不過大多數都係飾演較不討好嘅角色如情婦、援交妹等，2017年更憑著《踩過界》中喜愛夜蒲的女法官獲得《星和無綫電視大獎2017》「我最愛TVB女主角」，雖然角色不討好但依然獲得很多觀眾支持！

Ali一副暖心的笑容令人越睇越順眼，佢亦一直努力做好每個角色，終於於2018年擔正做《BB來了》女主角！不過原來Ali係冒住生命危險拍呢套戲，因為開拍前Ali曾做過婦科手術，加上檔期幾乎緊接《誇世代》，令佢完全冇時間休息，但佢仍冒子宮下垂風險出演，好博啊！

另外，因《BB來了》 唐恬兒一角情緒大起大落，加上身體負擔好大，令佢演得非常吃力，更試過回家爆喊，試過氣餒得唔想返工，最後播出獲得好成績對Ali嚟講意義重大！

一路打拼換來「視后」一獎Ali當中付出不比別人少，我地一齊期待佢將來有更多好嘅作品啦～！

Text：GirlsLike Editorial

Photo source：TVB, Instagram