「沒有感情就專心工作，感情就隨緣」39歲周勵淇無懼過往情傷，終覓得真愛～

By Aisa on 18 Dec 2018

一個追逐夢想的女生，深信未來是屬於相信心中美夢的人。

前晚《萬千頒獎禮》上蕭正楠就自爆已經同黃翠如成婚，娛樂圈嘅喜訊真係一個接一個，周勵淇（Niki）再於昨日宣佈同男友傅浤鳴結婚，二人喺家人見證下，於海外進行咗簡單嘅婚禮儀式。而Niki就喺Instagram上post咗同老公手拖手嘅照片宣佈婚訊：「我們結婚了，進入人生另一個階段，一切都是最好的安排，在此跟大家一起分享。」相入面佢雖然無著上白紗，不過從兩人嘅表情就可以感受到佢地嘅喜悅～

Photo from nk830@Instagram

Niki老公傅浤鳴（原名傅程鵬）係內地當紅演員，佢14年就已經同過Niki合演內地劇集《臥底》，17年後傳出兩人拍拖嘅消息，當時男方剛同結婚21年嘅圈中妻子離婚，兩人育有一子。而Niki同傅浤鳴呢段一開始備受指責、不被睇好嘅感情，幾經波折後今日終於修成正果～

Photo from nk830@Instagram

Niki過去曾經同過鄭家穎、紗廠太子爺Eric同埋內地小生徐正曦拍拖，只可惜戀情最終都無結果，如今39歲嘅佢終於覓得真愛，大家都好替佢高興～當年佢同鄭嘉穎因合作拍《翡翠戀曲》認識，呢對熒幕情侶戲假情真，之後再接連合作拍劇，愛得轟烈，大家都諗唔到佢地最後會因為感情變淡而分手。而鄭嘉穎今年同陳凱琳拉埋天窗，無幾耐之前，仲宣佈要做人爸爸，Niki亦終於搵到自己嘅Mr.Right。經過多年，兩人都找到屬於自己嘅幸福～

Photo from nk830@Instagram

Niki並無因為過往嘅感情經歷而對愛情失去信心：「過往的情傷都是成長過程」，而對於感情，佢一直都不徐不疾：「既然沒有感情就專心工作。感情就隨緣吧，若出現了，我也不會抗拒。」以前佢都會同一般少女一樣對「真命天子」有過各種憧憬，但隨年紀變化，就覺得其實兩個人溝通到先係最重要～而喺未遇上真愛之前，Niki努力裝備自己，發展演藝事業，令自己成為一個更好嘅女人，當你有自己屬有嘅魅力，你就自然會吸引到適合自己嘅人，所以大家都唔洗著急，緣份就隨緣吧～