富貴唔靠男人靠自己！34歲楊秀惠拒做花瓶做女強人，最愛買名錶贈自己：勞力士是自己工作的推動力～！

By Claire on 18 Dec 2018

最近楊秀惠（Vivian）在《大帥哥》中一場喊戲備受矚目，觀眾們睇到都大讚佢演技精湛，入行14年終於得到認同，令Vivian感到受寵若驚，亦同時多謝拍擋張衛健悉心為佢重新編排所有對白～不過其實Vivian不止得女演員呢個身份，佢仲係美妝店老闆，平日最愛買勞力士名錶俾自己，係一個實至名歸嘅女強人！

楊秀惠係馬來西亞人，2003年參選《馬來西亞華裔小姐競選》贏得冠軍，2004年再參選《國際華裔小姐》並於五強止步，但獲大台垂青簽為自家藝人，同年出演《赤沙印記@四葉草2》打響知名度，其後一直有出演不同電視劇，不過都係配角～

雖然接到嘅都係配角角色，Vivian都用心做好每個角色，直到2007年出演《奸人堅》瘋瘋癲癲嘅凌玉碧一角先再次引起觀眾關注，但事業一直都冇咩大突破。

2014年Vivian投資過百萬開美妝店「楊秀惠美妝店 Vivian Yeo's Beauty Sotre」做老闆，以代理不同國家嘅美容產品為主，並以自己做生招牌，成功由演員轉型做生意人，雖然佢為店舖日夜奔波而消瘦至90幾磅，但不到3年美妝店營業額便高達八位數字，於香港已經開咗5間分店，新加坡、澳門等地亦有分店，升級做商界女強人！

Vivian：「如找到可以信任和依靠的另一半是一種幸福，但絕對不是現今女士們唯一的出路。我相信靠自己努力賺取的金錢或成就，來得更有意義和實際，不過我亦相信獨立自主不等於不要另一半，反而擁有事業，不用依賴另一半，關係可變得長久和公平。」

Vivian喺做生意同時兼顧演藝事業，2016年出演《來自喵喵星的妳》嘅藍蒂莎，任性可愛嘅性格加上靚樣靚身材，大受觀眾歡迎，更提名「最佳女配角」。

而Vivian為人熟悉嘅嗜好就係買勞力士手錶，34歲已經擁有5隻名錶，當中包括價值$30萬嘅GMT MASTER II白金版Pepsi，呢隻錶係Vivian家鄉生意成功時佢買嚟獎勵自己～而每一隻錶都係對佢意義重大，如賺到第一桶金時買嘅入門級GMT MASTER II REF.116710LN、第一間美妝店賺到錢時買嘅玫瑰金DAYTONA REF.116515LN等等。