原來愛哭代表你是天才！研究：看電影愛哭的人不代表內心脆弱，反而是有同理心、觸覺敏銳的精英！

由劉以豪同陳意涵所主演嘅愛情片《比悲傷更悲傷的故事》掀起咗一陣「哭潮」，每個入戲院睇完出嚟嘅女仔，都話被佢超虐心嘅劇情搞到喊唔停，就算係男仔都話睇完好心噏！唔知道大家又係唔係一個平時唔會點喊，但每次睇感人電影就會喊到不似人形呢？唔好以為呢種愛哭鬼內心脆弱，先會咁易被劇情帶動情緒，其實正好相反呀～

如果你易入戲，睇親感人片，就好快會被劇情渲染情緒，唔好以為自好脆弱，其實你內心比普通人更加強大！每次睇到虐心嘅情節，都會自動代入角色，將自己當成係主角一樣，其實唔代表你內心脆弱或者情緒化，而係代表你係一個好識得易地而處、好有同理心嘅一個人～

睇電影嘅時候會感動落淚，係因為受到大腦運動皮質區嘅鏡像神經元（mirror neuron）所影響！而睇電影比較容易跟住主角邊落淚嘅人，比平常人擁有更發達嘅「鏡像神經元」，而呢啲神經元就好似一面鏡咁，可以幫你反映同埋代入其他人嘅經歷，令你有種感同身受嘅情況出現～

點解話呢種人係天才呢？因為要成為一位出色嘅領導者，係要擁有高度同理心～呢樣特質非常關鍵！好多人之所以唔適合擔任領導者嘅原因，就係多時候都因為唔能夠企喺其他人立場思考，只係顧住自己眼前嘅利益同埋成果，而忽略咗下屬第一身嘅感受。

而睇電影成日喊嘅人正正擁有高度同理心，無論係對下屬定係客戶都可以易地而處，滿足到各個單位嘅需求！同時，愛哭仲因為受到大腦釋放嘅催產素（oxytocin）影響，令呢啲擁有高度同理心嘅人觸覺好敏銳，對於身邊一事一物都唔會錯過～

所以，下次如果再有人取笑你睇電影成日喊，你就可以理直氣壯咁話比佢知，呢個係優秀領導者先擁有嘅特質！（笑）

Text: GirlsLike Editorial
Photo Source: Pinterest