容祖兒成阿嬌婚禮焦點！惹得全場來賓瘋笑，祖兒爆核彈級爆笑金句：「嫁出去嘅水，如潑出去嘅女」！

鍾欣潼（阿嬌）同老公賴弘國於美國舉行婚禮預演後，日前終於喺進行結婚註冊儀式，並於20號在港設婚宴～註冊阿嬌只宴請咗親朋好友，當日星光閃閃，容祖兒、阿 Sa 蔡卓妍、鄭希怡、Kenny關智斌、古巨基、老闆楊受成同Mani霍汶希都有出席祝賀一對新人。

當日阿嬌以一身裸色Deep V婚紗靚爆出場，胸前綴有紫紅色繡花加上浪漫盤髮，好優雅好有仙氣；而老公賴弘國則以簡單無呔西裝上場～

不過當日容祖兒卻意外成為婚禮焦點，事緣阿嬌與賴弘國完成交換結婚戒指儀式後，深情一吻時祖兒大叫：「好嘢！錫多啖，錫唔夠喎！」之後其他人對着阿嬌高呼：「我唔捨得你嫁呀！」然後祖兒就突然爆出一句：「嫁出去嘅水，等如潑出去嘅女。」

阿Sa聽到後感到句子邏輯唔係好啱，立即問祖兒：「係咪講錯嘢呀？好似係嫁出去嘅女等如潑出去嘅水喎！」，立即惹得全場來賓瘋狂爆笑！

之後祖兒呢句核彈級爆笑金句竟登上咗微博熱搜，網民都紛紛笑問祖兒「係咪飲醉酒？」，又大讚祖兒好可愛，就咁就成為咗全場焦點～！

祖兒之後向大家解釋返自己冇喝醉，只係唔小心口誤：「今日一滴酒都冇飲過囉，正日我會攞膠紙封住我個口。」（Joey真係好可愛啊～～～）

其實容祖兒酒量唔好眾所周知，佢仲試過因為飲醉酒而搞到唔少爆笑事，李克勤曾經爆料：「佢勁唔飲得，一杯香檳就胡言亂語，兩杯就瞓覺，會自己走去窗台瞓到一條魚一樣。」有一次祖兒仲醉到走去搵李克勤訓喺樓上嘅兩個仔仔，嚇得克勤老婆立即叫佢返落嚟。

仲有一次係前年Twins開演唱會，祖兒作為嘉賓上台表演，一到去就不停攬住阿嬌阿Sa，又話自己台下一邊睇一邊喊，阿嬌忍唔住問佢到底飲咗幾多，祖兒激動回應：「我冇飲過，我冇醉！ 」完美演繹醉酒人士嘅經典金句！

祖兒又表示20號阿嬌婚宴如有搶花球環節，佢唔介意再去搶，但被問到會否幫忙頂酒，祖兒就話只會酌量，因為驚自己會爆人私隱：「幾杯還可以，太多驚失禮又失儀，興之所至唱歌沒所謂，是怕飲酒後好難控制，可能會爆出秘密，但只會爆別人的，自己的就不會。」祖兒真係超級cute啊！

Text：GirlsLike Editorial

Photo source：Instagram