史上最狂交換聖誕禮物環節！昆凌一擲千金寵夫，交換禮物送「辣跑」，周董：人生第一次被女生送車！

By Michelle on 27 Dec 2018

Digital Editor

Life is short, don't be lazy . Be your own idol to enjoy every moment !

記得周杰倫同昆凌結婚時，豪花2000萬喺英國舉行古堡童話婚禮，氣派非凡，昆凌被寵成似公主一樣。婚後呢對恩愛夫妻仍然經常公開放閃，大家都封周董係「寵妻狂魔」，將老婆昆凌當成公主一樣捧於手心上錫到燶～其實昆凌又點會唔知老公對自己好呢～所以知情識趣嘅昆凌就喺聖誕節夾埋一班朋友，準備一個豪華驚喜畀「地表至強」老公周董，連見慣世面嘅周董都話畀老婆「嚇傻了」，周杰倫呢次真係做番一日「被寵的小公主」了！

Photo from from Sina

周董夫婦邀請眾多好友一起齊開Party，各自著上應節打扮，大搞一個「Ugly Christmas Sweaters Party」，同朋友慶祝就是爽！聖誕party又點少得要交換聖誕禮物，見到枱面上放滿禮物，真係見到都開心～事實上，好戲仍在後頭！

Photo from hannah_quinlivan @ ig

昆凌一早就同朋友夾哂計仔，務求畀老公最大嘅驚喜！在場好友令周杰倫抽到昆凌預備嘅「鞋盒」，一打開「鞋盒」，裏頭唔係一對鞋，而係一張張遊戲指示，周董乖乖地一一拆解。直到最後，周董跟隨指示去到車庫之中，驚喜就此出現！原來昆凌準備嘅係一架叫價高達350萬港幣嘅「辣跑」林寶堅尼，仲細心綁埋蝴蝶結，係人見到都即時血壓飆升！

Photo from jaychou ＠ ig

收到老婆驚喜嘅周杰倫就公開多謝太太「今年的聖誕交換禮物竟然串通朋友們讓我抽到昆凌準備的鞋盒，裡面打開開始各種遊戲指示，最後一個閉上眼走到車庫眼睛睜開真的嚇傻了...,謝謝你精心策劃準備的生日禮物，Thank u for this Birthday gift my love」周董仲話自己係第一次收到女生送的車～

Photo from jaychou ＠ ig

周董本身就係愛車之人，自己都有逾20台跑車，不過由老婆送嘅，一定更有象徵意義！據知呢份禮物其實係昆凌提早為老公下個月40歲生日預備嘅大禮，避免生日當天送贈欠缺驚喜，果然細心！

Photo from jaychou ＠ ig

周董圈中好友見到呢份「地表最狂」交換禮物後都忍唔住留言表達羨慕，好似蕭敬騰就寫道：「我交換禮物都還在面紙一包的等級，哥載我出去。」、林書豪笑說周董要回贈飛機畀昆凌等等，其中余文樂更調侃說：「富豪的生活啊！」，令周杰倫忍唔住反擊：「千萬別這樣說，你平常的手表應該也可以換車。」，粉絲們見到佢哋嘅對話都只能說「有錢人的世界我們是不能理解的」～(笑)