《大帥哥》譚凱琪入行18年演技終獲讚賞！獨力撐起家庭，星途曲折18歲曾因公司倒閉失業～

By Aisa on 31 Dec 2018

一個追逐夢想的女生，深信未來是屬於相信心中美夢的人。

近期hit爆劇集《大帥哥》入面，譚凱琪飾演張衛健嘅姨太太「天嬌」，表現出色，網民們亦因此而對佢有唔少正面評價。譚凱琪喺螢幕上演出到位，而現實中佢係個撐起三頭家嘅女漢子，除咗喺事業上密密耕耘外，私下更係一個好識照顧家人嘅孝順女。

Photo from zozotam1o1o@Instagram

宜家已經37歲嘅譚凱琪（Zoie）出道將近18年，2013年加入TVB主力喺演戲方面發展，一直到近年終於漸有代表作。其實由2017年開始，佢嘅演技就漸受觀眾注意，喺《不懂撒嬌的女人》、《跨世代》、《平安谷》，以及正在播出嘅《大帥哥》入面，譚凱琪都有令人相當驚喜嘅表現，而佢所飾演嘅角色戲份亦愈來愈重，可見譚凱琪嘅演技開始受到肯定～

Photo from zozotam1o1o@Instagram

喺劇入面譚凱琪經常飾演倔強嘅角色，但現實當中佢係一個好柔弱嘅女仔，而且仲係一個乖乖女。譚凱琪自細父母離異，之後同媽媽同住，但佢並無因為咁而憎恨佢嘅父親，反而仲主動幫忙照顧爸爸。成為藝人之後，譚凱琪為咗方便工作而獨居，再加上要照料媽媽同埋爸爸，可以話係擔起三個家庭，責任非常重大，而佢目前嘅奮鬥目標就係儲錢買樓比屋企人！

Photo from zozotam1o1o@Instagram

譚凱琪18歲出道嘅時候就會將收入分一半比媽媽用來養家，買每樣野之前佢都會諗得清清楚楚，有啲衫佢十年前買，但到宜家都仍然會著～而譚凱琪話佢之所以咁節儉都係因為受到原生家庭所影響：「我們共有4姐妹，當年父親養一家六口，所以也很節儉，可能由此被感染，從小到大就喜歡儲錢，小時候家裏有幾個錢罌，每次利市或零用錢便放去。」