成功勇奪「我最喜愛男歌手」！事隔18年再現樂壇頒獎禮，古天樂感謝粉絲支持：我好鍾意唱歌～！
日前香港樂壇又到派成績表嘅時間，講到今年焦點就係古天樂同謝安琪合唱《（一個男人）一個女人和浴室》，呢首亦係古天樂時隔多年後復出樂壇嘅作品，當時一出大家已經話會支持古仔重返樂壇，仲話要推佢做「最受歡迎男歌手」，而佢今年終於得咗啦！喺噚晚嘅「叱咤樂壇流行榜頒獎典禮」，古天樂獲票最高成功奪得「最喜愛男歌手」獎！
噚晚當主持人林海峰宣佈古天樂獲得「我最喜愛男歌手」獎時，全場觀眾都拍手叫好，歌手們都企起身以示尊重，古仔上到台就感謝粉絲們支持，更表示：「我真係好鐘意唱歌，但唔識唱歌，好怪，有奇迹出現！行到上台攞呢個獎，真係冇嘢好講！」
古天樂去年接捧成為「演藝人協會會長」，致力推動香港嘅演藝發展，佢表示自己好支持香港樂壇，並鼓勵新人們要記住夢想唔好放棄：「多謝投票嘅人，你哋唔駛企起身啦，大家最鐘意唔係我嘅歌，上年我做咗演藝人協會會長，第一個職責就係想幫樂壇，用僅餘時間同歌手食飯，了解樂壇嘅變化同困難，但佢哋團火係未熄過，我好開心，作為新人要記住，夢想每一日每一刻都唔好忘記，無論成功與否，做人要蝕底，記住要去試，就已經係成功嘅一半！我哋香港樂壇、廣東歌就靠你哋！」
而獲獎後大家都期待古仔可以開金口，喺容祖兒、謝安琪、張敬軒同麥浚龍等等嘅推波助瀾下，成功令佢開金口唱咗幾句經典金曲《男朋友》，台下仲幫佢打拍子，古仔嘅歌聲好好聽啊～！
古天樂喺2000年至2004年活躍於樂壇，期間曾發行過4張唱片，經典歌曲有《男朋友》、《今期流行》等等，又為電視劇節目唱過主題曲如《尋秦記》，後來佢專心發展電影事業，十幾年都冇現過樂壇頒獎禮！
唔少粉絲都希望古仔可以重返樂壇，但都一直等唔到，直至麥凌龍力邀古仔同謝安琪合唱《（一個男人）一個女人和浴室》，先成功令呢位「樂壇王者」開金口！
得知古天樂復出唱歌，唔少粉絲都表示十分興奮，更集氣希望令古天樂打入樂壇頒獎禮，最後真係成功咗啦，真係唔可以睇小網友們的力量啊！（拍手～～～～）
Text：GirlsLike Editorial
Photo source：Instagram, 903商業電台
