愛情長跑或閃婚都可以得到幸福！認定Mr. Right全靠這3點，這些甜蜜的明星夫婦話你知～

人大咗明白到愛情中感覺唔係一切，仲要考慮到好多現實因素，愈接近30歲，我地會不斷愜問：「身邊人到底係唔係嗰個，可以同你共同編織未來嘅伴侶？」「未來有無機會遇到更加適合自己嘅人？」「失去佢之後，仲可唔可以再找到愛情？」娛樂圈中都有唔少人曾經歷愛情長跑最後結婚，又或者剛相識無耐就決定閃婚，到底佢地係點樣睇清眼前人就係Mr. Right呢？

# 兩人一定要夠啱傾

Mr. Right係嗰一位要同你相伴一世嘅人，所以兩人嘅溝通頻率一定要吻合，先可以一直相處愉快。可能你地有共同興趣或者話題，或者可以互補不足比到對方生活上嘅建議，總之搵到一個同你啱傾嘅人係考慮作為終身伴侶嘅重要因素之一！

Photo from chungkayanlinda@Instagram

就好似鍾嘉欣，佢宜家係一個幸福少奶奶，但結婚前佢都曾經同伍允龍有過一段8年感情，戀情結束之後佢好快就同宜家老公Jeremy結婚生BB，原來鍾嘉欣同Jeremy初相識嘅時候，就已經發現二人有好多相似嘅地方，對方想法都好成熟，所以拍拖無耐就決定結婚，宜家佢地兩人有一囝一囡，一家四口非常幸福～

Photo from chungkayanlinda@Instagram

# 遇到困難 願意一起面對

拍拖嘅時候一定會出現分歧嘅時候，始終兩人係兩個獨立個體，各自有自己嘅想法～雖然面對同一件事情可能會有唔同嘅睇法，但只要佢係你嘅Mr. Right，你地就會聽取兩方意見，找出共識，擁有一齊解決問題嘅決心。

Photo from saxyphil@Instagram

好似林奕匡Phil同老婆Rikko拍拖10年，Phil面臨是否回港追尋音樂夢嘅掙扎，Rikko曾經因為佢陷入事業低谷、心情低落而一度鬧分手，不過Rikko最後都決定支持佢，仲同佢講：「如果失敗了，我們一起重新來過。」最後佢地嘅感情唔單止修成正果，Phil仲成為歌手，非常美滿～

Photo from saxyphil@Instagram

# 你希望他是長伴身邊的人嗎？

其實講到底，大家都係想搵到一個可以氹自己開心，令彼此感到幸福嘅另一半～所以喺考慮未來嘅時候，不妨可以問自己一句：「同呢個人一齊開心嗎？」當下腦入面第一個反應，或者就已經話咗你知對方係唔係對的人。

Photo from suitangtang@Instagram

台灣藝人隋棠同圈外人Tony拍拖4個月之後就閃婚，結婚三年一直恩愛如初。隋棠曾經分享過，Tony係喺對的時間遇見對的人，感覺到雙方都重視互動交流，所以有信心可以攜手面對未來嘅挑戰！

Photo from suitangtang@Instagram

Text：GirlsLike Editorial

Photo Source：Instagram