腳部受傷只能靠上半身演戲!黃宗澤帶傷拍攝,要坐著扮急步行笑翻網民,被大讚超敬業~

腳部受傷只能靠上半身演戲!黃宗澤帶傷拍攝,要坐著扮急步行笑翻網民,被大讚超敬業~

Hot Topics
By Aisa on 04 Jan 2019

黃宗澤Bosco早排就因為拍邵氏網劇《飛虎之雷霆極戰》整傷腳,雖然已經做完手術出院,不過為咗要追趕拍攝進度所以逼不得已要帶傷拍攝~早幾日佢就喺ig上面post咗一張拎住拐杖戴住頭盔嘅相,其實就係拍攝駕單電車場面嘅時候影嘅,真係睇到都覺得辛苦。而日前佢就要再次面臨演技大考驗,只可以靠上半身演戲,搞到Bosco自己都忍唔住笑話:「我真係唔識演!」

Photo from Instagram

Bosco因為拍攝網劇《飛虎之雷霆極戰》嘅時候整傷咗腳,雖然日前已經復工,不過仍然要包住石膏同撐住拐杖,仲要繼續接受物理治療,預計康復時間要三個月或以上,不過為咗趕上拍攝進度,佢要帶傷繼續拍攝,不過腳傷始終行動不便,所以Bosco有部分動作戲係由替身拍,之後再補佢上身近鏡。

Photo from Instagram

有替身聽起嚟好似好輕鬆,但其實反而係一個演技大挑戰~早前有一場駕單電車嘅戲,Bosco要戴起頭盔、揹起背襄,然後坐喺一張紅色櫈上演戲,要靠想像自己揸緊單電車,只用上半身做戲,真係諗到都覺得難~

Photo from Instagram

幾日前Bosco喺ig上分享咗影片,係一場拍攝急步行嘅花絮片段,片入面可以見到帶住腳傷嘅佢神色凝重地坐喺櫈上面,再由工作人員推住佢扮急步行,而Bosco就要左右擺動肩膊扮「行走」~

 

在 Instagram 查看這則貼文

 

boscowong(@boscomine)分享的貼文 張貼

起初佢都好認真咁「行」,但去中段就已經忍唔住爆笑,仲「投住降」話:「我唔識演啊導演……呢個真係……」同時Bosco仲留言話:「導演,一個不良於行嘅人,點樣好急咁行?我真係唔識演!」佢嘅爆笑演出令唔少圈內好友同埋網民都留言表示好好笑:「我睇咗10次都係咁好笑」、「睇一次笑一次」、「笑到有腹肌」。

Photo from Instagram

亦有網民大讚Bosco就算帶住傷都仍然盡力拍攝,相當敬業!又話只要你用手蓋住一半畫面,只係睇上半身,其實Bosco真係好似好急咁行緊,大讚佢好戲呀~!

Photo from Instagram

其實Bosco目前仍然係唔適合拍攝嘅狀況,佢每次坐低,都會因為雙腳向下令血流至患處而腫脹同麻痹~現階段應該要經常將左腳提起,但因為戲份越來越多,佢都好專業地帶住傷痛開工,希望 Bosco會早日康復啦~!

 

Text:GirlsLike Editorial

Photo Source:Instagram

 

【看更多OL專屬最新美容時尚資訊】

👉🏻 立即Follow Instagram topbeautyhk

🔔 訂閱我們的 Youtube 頻道 TopBeauty HK