人前低調私下甜蜜到爆！ 鄭伊健親述冧老婆招數，蒙嘉慧婚後成為幸福少奶奶～
今年51歲嘅鄭伊健一直被外界認為性格就好似個「大細路」，但佢最後都係被蒙嘉慧收服。二人拍拖七年、結婚五年，好少喺人前放閃，不過私下甜蜜到爆，伊健有一套獨有嘅冧老婆方法，令蒙嘉慧婚後成為一位幸福少奶奶～
結婚之後，兩人嘅夫妻相處之道，主要係以打機玩樂等共同興趣為感情保鮮。不過唔好睇伊健外表睇落成個大細佬咁，佢其實都有非常成熟體貼嘅一面，當年外母患癌，佢喺身邊扶持蒙嘉慧照顧病母，仲一擲近千萬買地建屋，令外父可以安享晚年～
嚟緊二月，伊健將會喺紅館舉辦個唱，而喺早前嘅記者會上，老婆蒙嘉慧仲靜雞雞拍片鼓勵老公，片入面佢話：「知道你為咗演唱會做咗好多準備，屋企啲過期食品等完咗先食，我會繼續做老婆做嘅嘢，唔使擔心我，湯水繼續有，老公加油！」
而伊健都話好驚訝，因為事前根本唔知老婆會拍片，而兩夫妻似乎係心有靈犀，因為早前受訪，伊健已經話過：「過往我開演唱會，佢都係做番自己，愈普通心情愈好，唔會有壓力，生活上亦都唔會有咩改變，做完演唱會就繼續返屋企，有湯飲咪飲囉。」
雖然大家都好期待伊健會喺台上唱情歌，情深款款凝望台下蒙嘉慧嘅畫面，不過伊健就話佢嘅性格就係大家都做嘅野佢就唔會做～佢認為每次開個唱，有老婆喺後台支持佢，已經好開心，有好大信心。等到開完演唱會，大家一齊諗去邊度旅行，非常窩心～
伊健同蒙嘉慧婚前婚後都一直保持低調，因為唔想將感情帶到舞台上，而兩人嘅相處之道就在於支持～伊健話過可以遇到蒙嘉慧佢好開心，婚後所有嘢佢都好放心，就連伊健嘅爸爸媽媽，老婆都替佢照顧得好好。而伊健平時亦會同老婆分享佢工作上嘅野，例如遇到啲咩事或者諗到啲咩，蒙嘉慧好多時候都會係第一個知，亦因為咁而令老婆更加安心～
咁啱佢地嘅嗜好都好相似，所以伊健話放假嘅時候，就可以同老婆好好地放鬆去玩，放完假又可以專注認真地做番自己嘅工作。佢地兩口子嘅生活其實好簡單，拍拖活動都同一般人無異～大家有着共同嘅嗜好，都鍾意運動、行山、踩單車，同埋打機，有時老婆仲會比佢更沉迷，呢一切看似平凡嘅事卻成為佢地獨有嘅浪漫～
Text：GirlsLike Editorial
Photo Source：Instagram
