感情超越愛情～周慧敏、倪震執子之手慶祝10周年錫婚，離離合合終究明白你就是我的養分。
上星期1月5號係「玉女掌門人」周慧敏同倪震結婚10周年紀念日，Vivian喺ig 放上同倪震嘅合照，倪震手捧寫有「Vivian n Joe 」嘅蛋糕，旁邊仲有幾個心心～倪震同周慧敏年齡只係相距3年，但51歲周慧敏仍然係跟10年前結婚嘅樣無太大分別，單手托腮微笑，淡妝下仍然精神奕奕，望落去仲好似有種「老夫少妻」嘅感覺呢，唔係倪震顯老，只係Vivian真係太似「美魔女」呢（笑）～
Photo from vivianchowwaiman ＠ ig
相識近30年嘅周慧敏同倪震曾被喻為圈中金童玉女，一個有樣、一個有才華，堪稱絕配～經歷多次離離合合，男方曾被傳媒影下偷食罪證，呢對金童玉女一下子被形容為女方上錯渣男賊船。
Photo from from Sina
傷了心，但就無傷了感情。當年Vivian曾發聲明，力撐愛人倪震—「今天我能夠成為自愛，懂得愛人，擁有著無比勇氣與承擔的女人，請不要小看這個精神伴侶在我背後為我付出過的一切努力，包容，寵愛，照顧與扶持。都生活了這麼久，沒有倪震，成就不了今天的周慧敏。」，又謂「我的伴侶絕對犯得起這個錯誤。」
Photo from from Sina
經歷20年風風雨雨，愛情智慧令Vivian愛得深、睇得更通透。大概就好似佢自己所講，「顯微鏡下看世界，任誰都難合格。」Vivian眼中嘅倪震雖然有瑕疵，但始終係獨一無二嘅男人。最後，倪震浪子回頭向Vivian許下承諾，婚後更變成「愛妻號」，收心養性。
Photo from from Sina
婚後二人感情生活低調，好少公開發閃。前年周慧敏爲紀念出道30年嘅「一萬天荒愛未老周慧敏30週年演唱會」做宣傳，接受專訪時，Vivian表示8年婚姻生活好幸福，佢自言好重視夫妻相處，如果知道老公得閒，佢亦都會盡量唔約好友外出，陪老公過二人世界。「珍惜一起相處的時間」係Vivian嘅愛情保鮮秘訣。
Photo from vivianchowwaiman ＠ it
兩公婆執子之手走到婚姻嘅第十年，仍然恩愛如昔，打破咗外界對佢哋婚姻嘅質疑，Vivian於IG上寫道：「Once upon a time……happily ever after.Just to make a long story short.Our 10th Wedding Anniversary！」（從前......從此就住快樂嘅生活，只想長話短說，這是我們的結婚10周年紀念日！）
Photo from vivianchowwaiman ＠ ig
Vivian曾經講過，人生中有三件美麗嘅事，其中一件就係能夠嫁畀倪震，甚至搞笑覺得自己「比倪震幸福」。天下間萬千愛侶，各人自有優點、缺點，更何況人無完人—既然每人都有缺陷，那麼愛情嘅結合，長久之道大概就係搵一個能夠跟你好好相處，而且相處不累人嘅伴侶了～
Text：GirlsLike Editorial
Photo source：Sina, Instagram
