過去成就今天樂觀的她！盧宛茵經歷離婚仍無悔選擇結婚：否則便沒現在3個仔女及4個孫～

Madam Lo盧宛茵上年因參演TVB劇《BB來了》而大受歡迎，早前佢仲喺《萬千星輝頒獎典禮2018》上獲頒「專業演員大獎」，表揚佢多年來嘅演藝成就～最近盧宛茵就接受咗港台《舊日的足跡》嘅訪問，回憶由當年入行到離婚復出嘅往事，對於過往經歷，Madam Lo無悔曾經結婚，因為無當初就無今日～

Photo from 《 BB來了》劇照

宜家已經65歲嘅盧宛茵喺節目上憶述自己從小喜愛戲劇，1973年參加TVB藝員訓練班入行。同年畢業後，因飾演《朱門怨》二少奶一角一炮而紅。

Photo from Sina

當年，佢就係喺化妝間遇上第一代新聞王子何鉅華：「這是命運，大家都忙住化妝，幾次之後他主動打招呼，我們就開始發展。當時我已經22歲，驚『攝灶罅』，於是乎嗱嗱聲嫁。」

Photo from TVB

佢話自己父母同其他星爸媽唔同，無因為覺得佢當時紅而叫佢唔好嫁住，反而給予佢好大自由～於是，盧宛茵就喺1975年同何鉅華結婚，婚後息影做家庭主婦。

不過呢段婚姻，只係維持咗12年。當時帶住三個囝囡嘅佢主動提出離婚，因為佢認為長痛不如短痛，如果雙方相處唔嚟只會辛苦，何苦難為自己。

Photo from TVB

宜家，Madam Lo話佢同前夫已經無點聯絡，通常係由囝囡去聯絡對方。雖然婚姻最後告終，但佢無悔當初嘅選擇，因為如果當年無揀到結婚呢條路，一定會錯過咗一啲野，就例如宜家嘅兩個囝同一個囡，仲有四個孫～

Photo from TVB

《舊日的足跡》嘅主持人車淑梅問到盧宛茵離婚後嘅感情生活，Madam Lo就笑言話：「自從離婚後一直沒男朋友，亦沒發覺有追求者，不如你介紹個畀我啦！哈哈哈！我好滿足，有兒有女，又有孫，仲攞埋獎。我新年願望是身體健康、事業有成、更上高峰。」

Photo from 香港電台

當年離婚之後，佢復出參演《季節》，成日都會覺得唔開心，當時鄧碧雲叫佢唔好「時時懷舊、掛住舊時」，因為咁樣只會令自己傷感，盧宛茵先開始反思，最後成為今日笑口常開嘅佢～每個人都有自己嘅過去，但過去成就咗今日嘅自己，呢一點大概就係Madam Lo想話比大家知。

Photo from Sina

Text：GirlsLike Editorial

Photo Source：Instagram