感動大批網民：忘了全世界也不忘愛你！84歲腦退化婆婆忘記女兒已長大成人，照去幼稚園接放學～

成日都有人話子女就係媽媽嘅一切～南京就有一名患有阿茲海默症（腦退化症）嘅84歲老婆婆，佢嘅記憶力時好時壞。佢以為早已經成年嘅囡囡仍然讀緊幼稚園，所以即使搬離舊居，都仍然搭車前往幼兒園接女兒放學。結果要召警察到場協助，婆婆嘅囡囡去到警局獲知背後原因之後，秒哭成淚人，而故事亦感動咗大批網民：「就忘了全世界也不忘愛你！父母才是最愛我們的人」。

患有腦退化症嘅南京老婆婆日前就趁屋企人唔注意嘅時候，跑咗出去～婆婆一家人發現婆婆失蹤之後都好緊張，因為婆婆本身行動不便，行路要用拐杖，仲成日唔記得呢樣嗰樣，可能會認唔到番屋企嘅路，要即刻報警請警方協助。

警方立即派人去到婆婆居住嘅社區附近巡察，並且仲翻查路口閉路電視，發現老婆婆喺路邊攔截咗一個路人嘅私家車。估計係婆婆表示自己嘅腳唔好，想對方載佢一程，而呢位名路人都好心地將佢送到巴士站，然後婆婆就自己搭巴士離去～

Photo from Pinterest

過咗幾個鐘之後，警方又接獲南京理工大學附屬幼兒園嘅報案，稱門口有位撐著拐杖嘅老婆婆迷路。呢名婆婆去幼兒園表示要去接小朋友，並講出女兒嘅姓名，但係園方話無呢名學童，於是只好報警求助。

經過警察調查後，發現婆婆就係失蹤嘅婆婆，而佢嘅女女早已經喺30年前從幼稚園畢業，但因為婆婆病情復發，記憶停留喺女兒仲讀緊幼稚園嘅時候，先會嚟呢到接女兒放學。

警方通知婆婆嘅屋企人前來接佢，囡囡趕到警局嘅時候，問婆婆點解要大老遠走去幼稚園，婆婆嘅回答令女兒一秒淚崩！婆婆諗都無諗就話：「搵你啊。」呢一句話，令大堆網民不禁鼻酸：「忘了全世界也不忘愛你！」。

呢個時候女兒先知媽媽病發，以為囡囡仲讀緊幼稚園，所以要嚟去接佢放學～婆婆嘅女兒即刻好感動，佢喊住話自己係屋企唯一嘅女，媽媽生佢嘅時候已經年紀好大，對佢百般呵護。後來媽媽患上失智症，已經搬離舊居多年，但依然記得接佢放學，不過都已經係30幾年前嘅事。

Text：GirlsLike Editorial

Photo Source：