42歲文頌嫻復出拍節目美麗依然！淡出娛樂圈因想專心照顧女兒，成為幸福靚媽～

提起文頌嫻（Annie），一定會諗起佢以前喺TVB拍劇常飾演古裝美女，佢2012年結婚，隨後淡出娛樂圈。而近日由周家蔚主持ViuTV節目《友枱VIP》，就請來好姊妹文頌嫻、梁靖琪同埋姚樂怡擔任嘉賓，「四魔女」難得聚首一堂，唔少網民都大讚42歲嘅文頌嫻保養得宜，依然充滿仙氣～

文頌嫻參演過唔少TVB劇集，90年代經常飾演古裝美女角色，《天子尋龍》、《金裝四大才子》就係較多人熟悉嘅作品～婚後嘅文頌嫻甚少參予幕前演出，佢表示要以家庭為重，唔想分心，要專注做好媽媽嘅角色。

當年佢同周家蔚、梁靖琪、姚樂怡、佘詩曼、湯盈盈同埋鍾麗淇因為拍攝TVB劇《七姊妹》結緣，後來佢地離開TVB後開始認識及了解，並結為義氣姊妹組成「七魔女」，互相支持。喺好姊妹阿佘嘅IG上，周不時都會見到文頌嫻嘅身影～

文頌嫻於1993年加入亞洲電視入行，並於1998年獲得亞視十大最受歡迎女藝員獎項。2000年轉投TVB，2003年拍攝《天子尋龍》飾演碧瑤仙子及楊玉環，成為女一。2005年嘅時候，佢離開TVB去到內地發展，唔少香港觀眾都覺得好唔捨得。

後來，佢於2012年同商人李梓慎（Jason）結婚，並於結婚當日宣布已經懷孕3個月。婚後文頌嫻淡出娛圈，誔下女兒Jamie，專心喺屋企相夫教女。雖然2016年曾經傳出佢丈夫生意出現問題，以致經濟危機，但文頌嫻代丈夫澄清謠言，並指一家三口生活幸福～

文頌嫻今年42歲，但保養得宜，完全睇唔出已經係一個6歲囡囡嘅媽媽～而近日佢更首度加入Instagram，發布唔少生活照，從照片中可以睇得出佢外表毫無走樣，網民們都大讚佢依然散發少女味～

可能要令觀眾們失望嘅係，文頌嫻暫時都未有計劃再拍劇，佢表示正讀緊小一嘅囡囡功課漸多，需要抽取時間去照顧同埋教導女兒，為咗做好媽媽呢個角色，文頌嫻可說係甘願放棄一切。

Text：GirlsLike Editorial

Photo Source：Weibo