陳凱琳囝囝Rafael照片曝光！入院剖腹產子感謝每個人的照顧，鄭嘉穎一索得子榮升人父～

By Aisa on 18 Feb 2019

49歲鄭嘉穎同27歲陳凱琳上年8月就喺峇里舉行婚禮，婚後陳凱琳就宣布懷孕～鄭嘉穎上星期五（15日）現身醫院，陳凱琳順利剖腹產子，當時鄭嘉穎向傳媒表示有好消息就會盡快公布。而喺剛剛陳凱琳就喺IG到發布囝囝嘅照片，並感謝每一個人嘅關懷同照顧，而榮升爸爸嘅鄭嘉穎就話：「個個父母都話自己個BB係最得意⋯我終於明啦！」

Photo from ghlchan@Instagram

去年11月22日，陳凱琳鄭嘉穎就宣布兩人將為父母。陳凱琳指會盡自己所能去照顧即將到來嘅新成員，更形容BB係上天比佢地最大嘅禮物。

Photo from ghlchan@Instagram

上星期五情人節翌日，有報導指鄭嘉穎現身港島一間醫院，據知太太陳凱琳已經入院順利產子，雖然當時鄭嘉穎無親口承認，不過佢睇落心情愉快，仲話有好消息會盡快公布！

Photo from ghlchan@Instagram

直到剛剛，陳凱琳喺IG發文，貼出囝囝嘅樣子，相入面可以見到BB側面，睇落鼻仔高高、眼大大，遺傳哂父母兩人嘅美貌，而囝囝嘅名叫做Rafael。而貼文中陳凱琳以英文感謝港安醫院醫護人員貼心又專業嘅照顧，令佢生產時舒服無壓力。佢又多謝家人同好朋友，仲話「要打從心底多謝每一個人（We want to thank everyone from the bottom of our hearts!）」，最後叫大家放心，媽媽同寶寶宜家身體健康狀況良好，更有爸爸鄭嘉穎悉心照顧，非常甜蜜！再一次恭喜鄭嘉穎同陳凱琳一索得子～！