演出意外拉傷，堅持做倒掛動作！鄭伊健6場演唱會，滿載與蒙嘉慧的甜蜜小細節～

By Aisa on 01 Mar 2019

鄭伊健24號起一連6場演唱會喺紅館舉行～舉辦到第3場嘅時候已經出現唔少插曲，伊健喺演出途中意外拉傷手臂，不過非常專業嘅佢，忍痛堅持將倒掛動作完成，喺台上表示雖然演出失誤但感受到台下嘅支持，覺得好感激～而演唱會嘅焦點，當然都係離唔開佢同愛妻蒙嘉慧，整個演唱會都充滿住佢地嘅甜蜜閃光彈～

Photo from ekin_cheng_official@Instagram

演唱會首場老婆蒙嘉慧當然有帶埋老爺奶奶前來撐場，近年佢因為身體唔好，所以好少喺公開場合露面。因為Yoyo平時有密密運動、行山，今次演唱會上亮相，睇落精神唔錯，而且身材依然好fit～

Photo from yoyomungofficial@Instagram

當伊健演唱到佢嘅典經情歌《一生愛你一個》，多次望向觀眾席上嘅Yoyo，向佢憑歌寄意～當佢唱到另一首熱門作品《感激我遇見》嘅時候，提到當初做歌手不被看好，感謝一路以來支持佢嘅所有人，尤其係太太Yoyo。

Photo from ekin_cheng_official@Instagram

伊健當然要多謝太太啦！Yoyo雖然身體唔好，但照顧伊健可以話無微不至，平時出門前都會有老浪為佢準備嘅愛心午餐同埋湯水，以慰勞丈夫工作嘅辛勞～

Photo from yoyomungofficial@Instagram

而演唱會中途亦發生咗一段驚險嘅小插曲，演出嘅時候，因為同舞蹈員嘅翻身動作，而令伊健拉傷手臂～不過非常專業嘅伊健喺受傷後，依然當無事發生，繼續喺台上又唱又跳，台下嘅人都為佢默默加油，而伊健都不負眾望，仲堅持完成倒掛嘅動作。佢喺台上仲話：「對唔住我頭先失手，扭傷咗，有啲唔開心，但係見到你地～好多謝你地嘅支持！」場面令人感動～