林海峰叱咤恭喜Anson Lo被斥過分親自解畫非整蠱MIRROR 姜濤喊著衝入後台被花姐安慰

By Fennie on 04 Jan 2022

Digital Editor

MIRROR在日前（1日）舉行的《2021年度叱咤樂壇流行榜頒獎典禮》狂掃8個獎，不過林海峰頒發「我最喜愛的男歌手」時，以自家作風逐個介紹最後五強，期間林海峰連番恭喜Anson Lo盧瀚霆，令Anson Lo差點以為自己得獎，並一度企起身，事後遭到「神徒」湧入社交網留言斥他玩得過份，而林海峰亦對這件事親自解畫。

Photo from ig@@koktakchiu

Photo from 節目截圖

林海峰在頒發「我最喜愛的男歌手」，逐一說出五位入圍者的名字時，現場哄動，當他講到「Anson Lo！恭喜你⋯⋯今年好忙。」開場，突如其來的停頓位加上現場氣氛，令Anson Lo誤以為自己得獎而一度站立，身旁的MIRROR成員都連忙送上恭賀，林海峰急急澄清：「唔係唔係，我講完自己都嚇死！」最後獎項落在姜濤手上。

Photo from 節目截圖

頒獎典禮結束後，不少MIRROR粉絲認為林海峰玩得太過份，令現場險重演當年關心妍誤搶獎事件。林海峰昨日（3日）在節目《在晴朗的一天出發》重提此事：「我一返到屋企聽到第一句『哎呀，過份咗喇！』咁我即刻反思，我睇番啲報道，鬧我過份、無品，對我冇乜所謂，好小事，反而睇啲留言，係大家對偶像嘅愛，先會有咁大反應，令人好感動。」

Photo from fb@Anson Lo

林海峰解釋自己非老師亦非評判，不希望跟其他DJ一樣純粹鼓勵，所以頒獎時決定輕鬆開玩笑。他又解釋，MIRROR在比賽中出身，心理質素強大、抗壓能力比一般人高，加上12子之間感情好，不會有芥蒂：「佢哋係一Team人，All In One，尤其係姜濤及Anson Lo，以佢哋嘅友誼，我覺得仲可以做一次咁樣嘅事！」

Photo from fb@Anson Lo

Photo from fb@姜濤

林海峰續指綵排時預計可以有半秒至一秒停頓，但現場反應最終超出預期：「講完張敬軒、Ian同Edan，我覺得觀眾知道我玩梗咩遊戲，就跟稿去講成句︰『恭喜你Anson Lo』，啱啱想睇邊個位入『好忙』嗰句，隔離嗰個E先生（Edan）已經『冚』埋去，啲觀眾已經嘩嘩嘩！我綵排過，亦幻想過觀眾反應，到底要停一秒定半秒好呢？不過真係無法估計現場反應，反應勁到我想繼續講埋落去都接唔到。當下我已經知道，冇喇今次，聽朝一定⋯⋯Anson Lo就攤咗喺後面，你知Anson Lo係個幾好嘅人，好可愛！」

Photo from 節目截圖

如果有重溫當時畫面，MIRROR成員都反應熱烈，旁邊的姜濤亦有拍膊頭叫Anson Lo起身。谷德昭大讚當Anson Lo知道被整蠱，所表現出來的反應直接又非常可愛，是真反應：「Anson Lo個反應好好睇，係杜琪峯拍先有呢個反應，係真反應嚟自一個善良嘅人。」

Photo from 節目截圖

另外，姜濤唱《Dear My Friend,》得獎歌時憶起故友而忍不住痛哭，之後立即衝入後台。商台DJ謝茜嘉和梁文禮大爆姜濤當時情緒未能平伏，立即衝入DJ房：「當時Vani喺度，Vani話『你知唔知頭先姜濤衝入嚟，佢直入廁所閂埋道門！』佢的確需要處理情緒。」謝茜嘉表示當時經理人花姐在場，花姐在門外同姜濤講了一番說話，姜濤才願意出來，不過謝茜嘉未有透露到底花姐同姜濤講了什麼。