請假是為了走更長的路～研究：多去旅行可提升工作能力，員工、老闆齊齊受惠！

放假去旅遊係唔少打工仔嘅番工動力，賺錢係為咗旅行嘆世界，每完結一次旅程就想即刻開始計劃下一次！原來去旅行唔單止可以用緊啲大假同比自己放鬆下，對於提升員工嘅工作能力都非常有幫助，有研究指多去旅行可增加創意、令人更懂變通！正所謂「休息是為了走更長的路」，為咗員工質素著想，老闆要體諒下啦（笑）

Photo from 電視劇照

有美國顧問公司公布一項研究，指出放假旅行可以提升員工工作效率～研究請來2,310位來自20個國家嘅上班族，發現瑞典同巴西嘅打工仔擁有最多有薪年假，全年有41日；而澳洲同埋美國就分別有28同10日年假～顧問公司要求受訪者完成指定測試，觀察佢地平常嘅工作效率，然後再以佢地所完成嘅工作，分析其工作品質同忍耐能力。

Photo from Pinterest

結果發現，較多有薪假期國家嘅受訪打工仔，唔理喺工作速度、品質定係忍耐力方面，評分都比少假期國家嘅受訪者略勝一籌～當受訪者被問到工作量會唔會太多，或者可唔可以有效地編排自己工作，有較多有薪假期嘅受訪者大多都可以肯定地回答，相反年假少嘅受訪打工仔就顯得有所保留。

Photo from 電視劇照

結果顯示有較多有薪假嘅員工工作效率普遍都比較高，不過研究同時都發現員工會承受較大嘅壓力，因為假期比較多工時相對較少，需要更快速度完成工作，因此效率亦會同時提高～

Photo from Pinterest

此外，去旅行係由零開始自己計劃，可以有效培養我地嘅領導同策劃能力～偶爾離開一下職場，放下手上工作，可以比機會員工好好釋放壓力，之後嘅工作都會更有效率、更有創意。英國有媒體指出，旅行時我地身心靈會漸漸放鬆，之前由工作累積嘅壓力會慢慢減退，此時我地嘅集中力會提升，之後無咁易覺得攰！

Photo from Pinterest

所以打工仔去旅行唔只對自己有好處，就連老闆都會受惠嫁！為咗公司著想，睇嚟小編又要開始望下啲機票啦～（笑）

Text：TopBeauty Editorial

Photo Source：電視劇照