敷完面膜要唔要洗面？解開敷面膜5大迷思，小心愈敷愈乾！
敷面膜已經成為愛美女生不可缺少嘅習慣～好似面膜達人范冰冰每年要敷700塊面膜，連行街、食飯、搭電梯都要敷住，可見敷面膜威力有幾咁大！不過每次敷完面膜都會有啲疑惑，到底隔幾耐可以敷一次？敷完又要唔要洗走殘餘嘅保濕液？一齊嚟解開敷面膜5大迷思！
Photo from ig @ wongtsuiyu
1.面膜可否天天敷？
其實面膜好似保養品一樣，一般保濕面膜係可以每日使用，當然要視乎天氣乾燥程度和皮膚情況～但如果深層清潔面膜、或含有刺激性物質，例如係果酸面膜就唔建議每日敷，因為過度清潔可能會洗去臉上過多油分，造成乾燥及敏感～
Photo from ig @ wongmanyik
2.敷完面膜要唔要洗面？
關於呢個問題一直都存在好多爭議，有人話片裝面膜上有防腐劑，敷後一定要洗掉，但有人話面膜上的都係精華，洗掉會好可惜～其實一般睡眠啫喱狀面膜敷住瞓覺係可以的，但片裝面膜上多數會有防腐劑，而且在敷的時間裡精華已經吸收入皮膚入面，其實殘餘係面上嘅精華基本上已經冇意義～但記住只用清水洗就可以了，用洗面奶洗就會白廢功夫啦！
Photo from ig @ liaise
3.敷面膜時做面部表情會起皺紋？
好多女仔敷面膜時塊面郁都唔敢郁，驚面膜上嘅皺摺會令面上長皺紋！但其實面膜上嘅摺痕基本上同皺紋冇太大關係～不如擔心平時嬲嬲豬會起皺紋好過啦～！
Photo from ig @ heidibibe
4.面膜敷太耐會愈敷愈乾？
一般建議面膜敷10-20分鐘就可以，如果敷太耐真係會愈敷愈乾！因為面膜乾掉會反吸你臉上嘅水分～保唔到濕之餘仲有反效果！所以敷面膜嘅時間最好準備活動比自己做，例如睇下書，或者煲下劇，以免自己唔小心瞓著呀！最穩陣當然係較返個鬧鐘啦！
Photo from ig @ chrissienana
5.敷完面膜後還要塗保養品嗎？
敷完面膜嘅時候塊面已經好保濕，好多女仔都會直接跳過塗其他保養品嘅步驟，但其實敷完面膜一定要塗上乳液或乳霜！如果少左呢個動作，面上有水分嘅時候反而會令水分蒸發得更快，肌膚就會愈敷愈乾～記得唔好忘記敷完面膜要用清水洗面，然後用乳霜鎖水啊！
Photo from ig @ mayannem
Text：TopBeauty Editorial
Photo source：Instagram
