張韶涵獨創「內功外功保鮮法」，36歲仍然一副凍齡娃娃臉！10招保鮮法養成逆齡肌～

36歲嘅張韶涵保養得宜，擁有一張「逆生長」嘅娃娃面同窈窕體態，完全唔覺得佢已經係36歲！早前張韶涵參與內地節目《我是歌手2018》，畀眼利網友發現佢16年前出道嘅樣無太大變化。張韶涵就喺「小紅書」內笑指「怎麼可能沒有變化呢？」，亦跟大家分享一系列「保鮮法」，即使你無張韶涵嘅娃娃五官，就學佢一樣養成凍齡皮膚吧～

要凍齡肌膚，內外都要做好護理，正如中醫奉行嘅外敷內服一樣，張韶涵係「小紅書」上都指出自己嘅「保鮮法」分成「外功」同「內功」，唯有內外兼備，皮膚先可以自然排毒有光澤～

Photo from angela_zhangshaohan @ ig

6大「凍齡」外功：

＃1 了解自己肌膚類型同問題，精準護膚。

＃2 防曬係非常重要，唔可以只係依據朝早搽一次，如果當日留喺戶外嘅時間較長，就需要補防曬。市面上已經有唔少碎粉狀、噴霧式防曬，唔會整花個妝之餘輕鬆補防曬。

＃3 保持皮膚、毛孔清潔，夜晚必須做好卸妝工作。

＃4 疏通淋巴有助幫皮膚排毒。

＃5 補水面膜可以多敷。

＃6 有暗瘡、黑頭問題千萬唔好多手擠

Photo from angela_zhangshaohan @ ig

4大「凍齡」內功：

正如張韶涵所講，護膚應該要由內而外。一出道時，張韶涵話佢花咗唔少錢喺外用保養品上，後來就發覺從內調理皮膚狀態先係擁有美肌嘅基礎。所以女生們要記住，內調+外塗=效果！

＃1  戒糖、戒加工麵食

過量攝取糖分，會令皮膚加快衰老。原理係多集嘅糖分會依附喺膠原蛋白上，令膠原蛋白糖化，會生皺紋、皮膚變黃、甚至甩頭髮。戒食加工麵食比如麵包、蛋糕等，多食粗糧、全麥麵包等。另外，飲品例如係奶茶、化學果茶都係中伏位～

小提示： 如果真係忍唔住想吃甜，可以選擇飲蜂蜜水解饞！

Photo from angela_zhangshaohan @ ig

# 2 補充膠原蛋白

隨住年齡增長、捱夜工作、食得太多甜、減肥節食都會令膠原蛋白大量流失，隨之而來就係長皺紋、皮膚失去彈性。張韶涵指佢從20歲左右已經開始關注補充膠原蛋白，多食有豐富膠原蛋白嘅食物，例如花生豬腳湯、豬手、花膠燕窩等等。

小提示：張韶涵指出深海魚皮膠原要比牛膠原好，唔會有激素問題；另外，補充膠原蛋白並唔係一食就會見效，要有耐心堅持。

＃3 超級食物製成果汁

超級食物（superfood）一方面可以補充能量，另一方面可以幫助抗氧化、排毒。女生可以根據個人需求去調配果汁。以抗氧化為例，石榴、番茄仔、藍莓都係係超強天然抗氧化水果～

＃4 經常飲水

飲多啲水﹐皮膚會變好呢個講法大家都應該無異議，仲有一個小貼士，就係由飲凍水轉飲暖水，細口細口慢慢飲，咁樣飲水可以更容易被皮膚細胞吸收。有飲開檸檬水美白嘅女生，要注意維他命C必須係 5分鐘內飲用。

Photo from angela_zhangshaohan @ ig

一時三刻要建立以上習慣，或者改變生活飲食習慣當然有難道，但「凍齡」就好似運動一樣，有做總比完全唔做好，一開始時，唔需要覺得「必須完全唔食」，呢個諗法反而令自己打退堂鼓呢～

Photo from angela_zhangshaohan @ ig

Text：Girlslike Editorial

Photo Source：Weibo, Instagram