小心墮入「健康」陷阱！6大「假健康食物」，看似不致肥，其實高糖高脂肪

By joycecheung on 16 Apr 2019

香港人愈嚟愈講求健康，市面上唔少食品都會標榜自己「健康」、「低糖」、「低脂」，但其實唔少看似健康嘅食品其實高糖高脂肪，消費者一個唔小心就會跌入「健康」陷阱！今次小編介紹6款平時大家都認為健康嘅食物，唔想愈食愈肥就記得要睇落去！

Photo from ig @ zozotam1o1o

Photo from ig @ aliaime

1.乳酪

乳酪含有鈣質、蛋白質，而且可以增加腸道益菌，本身都算係健康食品，但乳酪本身味道較酸，市面上大部分乳酪都添加大量糖分，根據消委會2017年調查，本地品牌的原味無添加乳酪，每100克已經有8.9克糖，相等於三分一罐可樂！食乳酪之前記得要睇清楚糖含量，揀標明「無添加糖」就會相對健康，不過乳酪始終會有一定脂肪，減肥中人士記得唔好食過量啦！

Photo from Pinterest

2.加工穀麥片

穀麥片係唔少人一天嘅早餐，皆因即開即食夠哂方便～穀麥片就咁聽好似好多纖維夠哂健康，但其實市面上唔少品牌為咗提升穀麥片嘅味道，添加蜜糖、楓糖、朱古力醬等，間接食咗勁多糖落肚！想健康啲建議選擇原粒無添加麥皮，另外加無糖豆漿，想好味啲可以加新鮮生果例如香蕉、士多啤梨、藍莓等～

Photo from Pinterest

3.果乾

減肥時唔可以食薯片蛋糕等零食，食果乾好似比較健康！不過要留意，無論係泰國芒果乾、定台灣芭樂乾，其實大部分果乾都會加入大量糖分，建議可以選擇無添加糖嘅提子乾、無花果乾或杏脯乾，咁就食得安心啦！

Photo from Pinterest

4.無糖汽水

減緊肥嘅時候好多時都想放自己一日假，放縱一下飲汽水～好多時都會選擇冇咁大罪惡感嘅無糖汽水，事實上市面好多無糖飲品都會利用阿斯巴甜製造甜味，無糖可樂中嘅代糖會刺激身體釋放出多巴胺，令你飲完後仍然對甜味充滿渴望，反而會增加飢餓感；另外，代糖會讓身體誤以為已經攝入了糖分，新陳代謝系統會發出分泌胰島素的指令，繼而產生脂肪；代糖更加會減慢新陳代謝速度，增加身體脂肪積累！

Photo from Pinterest

5.素肉

市面上大多數素肉都係以黃豆製成，但有機會係加工過程中加入食物添加劑，例如穩定劑及乳化鹽來維持素肉的質素，而為咗令味道更似肉可能會添加大量鹽份和增味劑，食得多可能會令鈉含量超標！

Photo from Pinterest

6.樽裝綠茶

夏日炎炎最想就係嘆返杯冰涼凍飲，有好多人都會去便利店選擇樽裝茶，感覺會比汽水健康一點，但其實好多樽裝茶為咗保持品質都會添加色素、防腐劑、增味劑等，而有部分樽裝茶更加唔係由原片茶葉沖製出來，可能係用茶粉、茶濃縮液或茶提取液，而且一般都會用高溫殺菌，破壞咗本身營養價值！想飲茶嘅話都係自己新鮮用茶葉沖啦～