「夫妻相」有科學根據？！伴侶的外貌相似度竟跟關係親密指數有莫大關聯！
有無發覺拍拖一段時間後，你同男朋友長相變得愈來愈相似？其實「夫妻相」係有科學根據架～而且呢個現象仲反映你同情人嘅關係親密度㖭！
Photo from edwinsiu @ ig
Wharton教授Jonah Berger指出伴侶趨向搵同自己外貌至少有少許相似嘅人結婚～認真諗下，身邊嘅人有無呢啲例子，甚至你自己同男朋友本身又有無相似？有一篇刊登喺’Motivation and Emotion’
嘅研究指出，情侶見面時間愈多，佢地就會開始愈似樣～呢一個外貌上嘅變化係歸因於伴侶潛意識互相模仿彼此嘅面部表情嚟表達自己嘅情緒同感受！
Photo from ghlchan @ ig
而呢一個現像喺已婚夫婦間更為常見，因為雙方會花大量時間去觀察同聆聽對方，所以佢地唔只係會分享居住空間同食物，仲會分享埋情緒，會一齊笑，一齊喊，甚至會一齊嬲～經過長時間相處，會令到伴侶嘅面容有同對方相似嘅細微痕跡。另外，Berger更指出隨時間同伴侶變得更似樣嘅夫婦對婚姻有更高滿意度，而情感模仿通常係來自於「同情」，所以對一段關係發展有好大幫助～
Photo from rahrahsong ＠ ig
如果下次有人話比你知你同另一半愈嚟愈似樣，你應該要開心，因為呢個係一個你地互相滿足到對方情感嘅跡象呀！
Text：Girlslike Editorial
Photo source：Instagram
