冰鎮護膚品專用小雪櫃！延長護膚品壽命、保存養份效果加倍，歐美大熱「迷你美容冰箱」～！

大家都知道將護膚品放雪櫃會令佢地更耐用，當中養份會被保存得更完全，令護膚效果加倍～不過，放屋企雪櫃有時會被蔬果、隔夜菜搞到污糟邋遢，唔好彩仲會發生氣味轉移，成支護膚品都充滿雪藏味，真係好心痛！宜家我地終於有機會擺脫過去啦，因為最近出咗個「迷你美容冰箱」，專畀你放護膚品用！

呢個「迷你美容冰箱」喺歐美同韓國都大熱，除咗外形可愛、打卡滿分外，佢仲好實用！細細體積但夠你放晒所有護膚品入去之餘，側邊仲有位放小工具同面膜，真係好實用㗎～

仲可以自己裝飾個雪櫃門添～

冰鎮後美容效果加分

雪住啲護膚品可增長佢地嘅壽命外，有時天氣熱、皮膚過敏紅腫時，用冰鎮過嘅保濕噴霧、面膜或浸過化妝水嘅棉花，都可以令佢地嘅收毛孔同保濕功效大大增加，而且喺炎炎夏日，仲可以帶嚟冰涼嘅舒服感覺，真係諗起都覺得好爽！

可以放心入手天然護膚品

天然護膚品對皮膚好就一定，但佢地大多不含防腐劑，所以特別容易變質變壞，特別夏天無開冷氣又熱又潮濕，通常買返嚟就會好快開始變味！有咗呢個雪櫃就可以24小時雪住佢地，慢慢用都唔使驚會變壞浪費錢～

訓醒返工唔再怕臉腫腫！

呢個迷你冰箱仲可以畀你雪住消腫美容小物如湯匙、《如懿傳》中嘅玉石滾輪等等，一訓醒用佢地嚟敷敷眼同碌面，即刻可以消水腫，上妝仲可以更貼服，返工出街前用真心超方便！

Text：TopBeauty Editorial

Photo source：IG@makeupfridge