週末相約男友、閨蜜去看海吧～專家：海洋有治癒心靈力量，舒緩焦慮、提高創造力！

By Michelle on 10 May 2019

Digital Editor

拍拖節目嚟嚟去去都係食飯、睇戲、行街...有時放假都唔知做咩好，寧願留喺屋企都唔想出去同其他人逼，唔知你有無同感呢？～久而久之，連拍拖都「懶惰」了...想有啲新鮮感，跟伴侶維繫感情之餘，又可以唔需要花高昂貴用，都可以有暢遊異地嘅輕鬆快感，不妨相約另一半去「看海」！就連科學都證實「看海」的確有治癒心靈嘅作用呢～

Photo from kelllycheung @ ig

大家都知道戶外活動好處多多，如果想輕鬆一啲，可以襯著美好周末跟另一半去海灘，又或者到郊外搭船出海，感受一下大自然帶畀你奇妙嘅力量吧！清澈而蔚藍嘅海洋會為你帶來美好而寧靜休息時間，想放鬆身心唔一定要去做貴價spa同出國旅遊嘅，看海都可以令你身心得到治癒～

＃1 舒緩焦慮

都市人生活節奏急促，壓力令人喘不過氣，卻無從放鬆，甚至影響身體出現健康警號。當你專注聆聽、呼吸、感受海洋帶畀你嘅視覺、聽覺、嗅覺，專家表示呢個方法有效幫助降低抑鬱、焦慮程度。帶同野餐墊、喜歡嘅食物，相約伴侶一同看海，遠離煩囂舒緩內在壓力吧～

Photo from kelllycheung @ ig

＃2 改善睡眠質素

有研究證實，水同波浪有改善睡眠嘅能力。所以大家去做spa時，背景音樂大多都係以大自然聲音—如流水聲、海浪聲、雀叫聲......閉上眼睛，以聽覺感受海洋帶畀你嘅治癒能力，可以幫助你放鬆，享有一個真正放鬆嘅假日。

Photo from kelllycheung @ ig

＃3 重新審視自己嘅人生

香港地生活節奏快速緊湊，有時連出去玩，都會不其然有「趕行程」嘅習慣，唔想放過一分一秒去打卡、睇景點。如果真係想好好放鬆，可以花一啲時間喺有海浪聲嘅地方悠然自得度過一日，你會發現自己從寧靜中得到釋放，舒緩繃緊情緒之餘，更可以重新思考生活嘅優先順序，曾經以為解決唔到嘅煩惱都會消失得無影無蹤，接下來嘅生活都會活得更有自信呢～