亞洲限定！自帶補光燈的無重祼妝～Nars全新氣墊粉底開箱
限定化妝品又嚟喇！NARS嘅底妝無論粉底、遮瑕膏都好受一眾女生歡迎，今次隆重出推Natural Radiant Longwear Cushion Foundation系列，仲要係亞洲限定！大家係咪心郁郁想試呢～
先講講包裝，正方型粉盒設計，線條俐落非常型格！無論由外到內，都用上黑色霧面材質，令整個氣墊粉餅更有格調同質感。
今次亞洲限定版本一共有六種色調，迎合亞洲人肌底膚色。而BB Cushion主打「無重妝感」，用完會有自帶補光燈嘅光澤感。有用過NARS底妝產品嘅朋友知佢嘅遮瑕高非常之高，呢個氣墊粉餅都唔例外！一試上面已經感覺到高度遮瑕嘅威力，基本嘅一啲微絲血管、泛紅、暗瘡印都能夠遮到，而且唔覺得厚重。
質地方面都偏向水潤，唔會話因為遮瑕度高而感覺太乾，粉底延展度高同易推，按一下都可以搽勻成塊面，當然追求零瑕妝感嘅朋友可以輕輕疊加上去，亦唔會有卡粉嘅情況！另外持妝能力強，可以做到抗汗、抗氧化嘅效果，係炎炎夏日個底妝可以Keep到大半日，加埋有SPF50 PA+++嘅防曬系數，咁就唔怕會曬黑啦～
新品加入紅桑莓、蘋果、西瓜同白蓮萃取成分，可以令肌膚更有光澤感同彈性，亦唔會話化得妝多令皮膚變差，反而有修護同抗污染功效！一盒自然亮采持久氣墊粉底售價係港幣$410，有興趣嘅朋友快啲去專櫃試下色喇！
更多相關文章：
Text：TopBeauty Editorial
Image：TopBeauty Editorial
