捕捉氣質的瞬間！百搭大地色眼影人氣三選～永不過時的眼妝色調

要講到最適合亞洲人輪廓嘅眼影色，大地色真係可以話係首選中嘅首選～切合偏黃皮膚嘅色調之餘又可以輕易打造輪廓，完全無浮腫嘅問題！而大地色呢個名稱都好廣義地包含各種色調嘅啡色，依定一齊嚟睇下有邊幾款今季大熱又非常百搭易襯嘅大地色眼影啦！

GIORGIO ARMANI EYE TINT 薄紗眼影液

最常見當然係粉狀眼影，貪佢易控制又上手～不過原來揀啱眼影液都可以好正！好似今次小編試嘅呢款GAB EYE TINT咁，質地好似絲緞一樣，非常幼滑，而且好好推！用嘅時候唔會擔心個範圍難控制，只要點係眼窩中間用手指推開就可以，加上今次嘅EYE TINT有智能眼影薄膜，上到眼皮極之貼服，hold全日都唔會甩～

全系列一共有17款顏色，9款係最新嘅金屬幻色，係唔同角度睇會隨著光線有所變化！而小編就揀上帶金屬風嘅玫瑰大地色，係啡色調中滲入點點嘅粉紅調，有一種平易近人嘅氣質～

NARS Summer Lights Face Palette

今次Nars呢個眼頰組合盤真係非常實用百搭～有四色眼影組加埋兩格光影粉，而且呢個組合同包裝都係夏日限定，粉絲們又點會忍到手！

四色眼影包含霧面、珠光、閃爍三款質感，顏色層遞上已經可以造到好靚嘅漸變色，而呢盒眼影色調以偏金銅色調嘅大地色為主，加埋一條俐落嘅眼線，即時轉走型格妝感！

Dior 三色眼影 - 珍藏版

最後就係Dior瘋搶嘅三色眼影組！！！當中最hit最搶手可以話係呢款珊瑚蜜桃色，搽上眼睛同皮膚融合會反映出滲入點點橘色元素嘅大地色，令成個眼妝好有活力嘅感覺～

另一個令人心動嘅地方就係整個眼影嘅包裝！以經典DIOR OBLIQUE手袋為靈感設計，打開眼影見到咁精緻嘅Dior壓紋，真係叫人唔捨得用啊！