中長髮不只有內彎髮型！單用直髮夾也捲出浪漫捲髮～難度值連手殘女也學得到！

中長髮真係一個令人又愛又恨嘅長度，唔夾頭髮又尷尬，夾完又好似來來去去都係內捲梨花頭～一直以來都好羨慕日本同韓國女生就算中長髮都可以有咁多造型，不過原來一啲都唔難，仲要用一支直髮夾就做到！一齊睇下小編示範啦～

Style 1

每日都會夾頭髮嘅朋友會發覺，尤其髮尾部分特別容易受損，所以夾前護理好重要，記得先搽上頭髮抗熱產品啊～令夾頭髮過程更易控制，可以先將頭髮分成產上下兩部分將下層頭髮夾出水波紋，每次攞一小撮髮絲，由上而下分別向內外屈曲，大致三個波浪，而髮尾一定要向外翹。

夾完底層頭髮之後，上層頭髮用另一個捲法處理！每次攞一小撮髮絲，由蘋果肌下位置開始，用直髮夾向內拉至髮尾，就會得出好自然嘅捲度～

最後去到瀏海，捲得太上會顯得老氣，所以係靠近髮尾位置輕輕向內捲一下就可以。最後噴返啲啞光定型就可以出街喇！

Style 2

第二個造型空氣感重一啲，啱晒一啲髮絲比較幼同頭頂位置扁塌嘅女生～開始夾頭髮之前都要做足抗熱功夫喇！同樣將頭髮分開上下兩層處理，而今次底層頭髮就簡單啲，普通夾內彎就可以！

而上層頭髮比Style 1嘅單一方向做法複雜少許，夾嘅手法基本一樣，都係夾起頭髮屈一下再拉到底，不過方向就以梅花間竹嘅形式，分別向內同向外拉，第一束向外、第二束向內，第三束向外⋯⋯如此類推，令到髮絲之間嘅空氣感增加！

而去到瀏海就要向外捲，最後想空氣感更重，可以加一啲蓬鬆粉係髮頂就完成喇！

Videographer： Kason Tam & Nathan Chan

Photographer：Kason Tam

Video Editor：Kason Tam

Content Editor：LaamLaam IP

Hairstylist：Perry Law@WP Salon

Model：Kiki Cheung